Policia ka bllokuar dhjetëra mjete lundruese në zonat bregdetare të cilat kanë shkelur rregullat. Mësohet se në kuadër të operacionit “Siguria Detare” janë kontrolluar 431 mjete lundruese në të gjithë hapësirën ujore nga Ksamili në Velipojë ndërsa janë bërë kontrolle edhe në zonat me liqene e lumenj.
30 mjete janë bllokuar gjatë javës së fundit, prej të cilave 18 jet ski, 7 skafe, 3 gomone dhe 2 varka metalike me motorë të instaluar.
12 prej tyre po lundronin brenda perimetrit të sigurisë, duke rrezikuar jetën e pushuesve ndërsa drejtuesit janë ndëshkuar me masë administrative prej 100,000 lekësh secili.
Ndërkohë, në kuadër të të njëjtit operacion, në 7 raste emergjente nga Ksamili në Velipojë, 13 shtetas shqiptarë dhe të huaj janë shpëtuar në det nga Policia Kufitare dhe Njësia Policore Detare, për shkak të dallgëve të forta ose defekteve në mjetet e tyre. m.p.
