Presidenti i Partisë së Lirisë, Ilir Meta ka kërkuar nga opozita shqiptare që të ndërmarrë një aksion më të gjerë dhe më konkret për luftën ndaj korrupsionit, teksa ka folur edhe për hetimet e Prokurorisë së Posaçme SPAK ndaj tij, duke thënë se ato dështuan dhe asnjë provë nuk u gjet.
Gjatë një interviste televizive, Meta ka bërë me dije se hetimet e kryera ndaj tij, në dy muaj s’kishin asnjë lidhje me të, por kishin të bënin me persona të tjerë.
Mbi këtë, ai pretendoi se këto veprime përdoreshin për të justifikuar paraburgimin e tij.
Ai ka shtuar se zgjatja e komunikimit të akuzave kishte të bënte me veprime procedurale, të cilat kërkonin një kohë fizike të caktuar, si nga ana e tij edhe e avokatit.
Qëllimin për këtë, Meta e sheh te “eliminimi i tij politik” dhe “rrëmbimi i Partisë së Lirisë”, apo edhe frikësimi i opozitarëve.
Gjithashtu Meta tha se Partia e Lirisë do merret seriozisht me të gjitha çështjet e drejtësisë, përfshirë edhe ndryshimet që duhen në Kodin Penal dhe Kodin e Procedurës Penale, duke u konsultuar me grupet e interesit.
Mbi të gjitha, përmend një aksion opozitar duke intensifikuar luftën kundër korrupsionit./E.T
