Arqile Pipa, një nga specialistët shqiptar më të dalluar të naftës dhe gazit, ka ndërruar jetë në moshën 72 vjeçare në Amerikë. Lajmin e trishtë e ka dhënë familja, e cila zemërthyer njofton se Leu, siç e thërrisnin të gjithë, ka mbyllur sytë përgjithmonë më 3 Gusht.
Inxhinier Arqile Pipa mbante gradën “Doktor i Shkencave” dhe ishte një personalitet me integritet të lartë që ka lënë gjurmë të pazëvendësueshme me kontributin e tij në industrinë e Naftës dhe Gazit në Shqipëri.
Janë, gjithashtu, dhjetëra punime studimore e shkencore në këtë fushë që mbajnë emrin e tij. Arqile Pipa ka kontribuuar edhe në tekstet shkollore dhe universitare, që kanë udhëhequr studentët e Universitetit të Tiranës dhe Qendrës së Kualifikimit të Punonjësve të Naftës.
Pas zhvendosjes në Amerikë me familjen, ai ka punuar si profesor i shkencave të Matematikës dhe Fizikës, ndërsa një kontribut të çmuar ka dhënë dhe si anëtar i Shoqatës Shqiptaro-Amerikane dhe komunitetit shqiptar në Cleveland, Ohio.
Familja Pipa njofton të gjithë miqtë që ndodhen në Amerikë dhe duan të marrin pjesë në pritjen dhe homazhet për të, se ato do të zhvillohen nesër, më datë 6 Gusht nga ora 16:00-20:00, kurse ceremonia mortore do të mbahet të enjten, më 7 Gusht, nga ora 10:00 deri në orën 11:30, në Berry-McGreevy Funeral Home, 26691 Detroit Rd., Westlake, OH 44145.
Përcjellja për në banesën e fundit të inxhinierit dhe intelektualit Arqile Pipa do të bëhet pas ceremonisë mortore të së enjtes, në Saint Joseph Cemetery, 32789 Detroit Rd. Avon, OH 44011.
