Prej disa ditësh, Vlora është bërë destinacioni më i fundit i elitës globale. Miliarderi francez Bernard Arnault, një nga figurat më të fuqishme të biznesit luksoz ndërkombëtar, ndodhet në ujërat e kristalta të bregdetit shqiptar, duke shijuar pushimet verore në jahtin e tij super luksoz.
Arnault, i cili është kryetar dhe CEO i LVMH, konglomeratit më të madh të mallrave luksoze në botë (Louis Vuitton, Dior, Fendi, Givenchy, Mowt & Chandon e shumë të tjera), renditet aktualisht si njeriu i gjashtë më i pasur në botë. Pasuria e tij, sipas Forbes, kap vlerën 148.7 miliardë dollarë, ndërsa sipas Bloomberg arrin në 155 miliardë.
Burime jozyrtare bëjnë të ditur se Arnault ndodhet në Shqipëri për një pushim, ndërsa jahti i tij është fotografuar përballë Gadishullit të Karaburunit.
Ndalesa në Shqipëri vjen vetëm pak javë pasi Jared Kushner dhe Ivanka Trump vizituan gjithashtu rivierën shqiptare, nga Dhërmiu në Sarandë, dhe më pas Richard Grenell u shfaq në Ksamil e Sarandë me miq amerikanë.
Vlora, duket se po shndërrohet gjithnjë e më shumë në një pikë elitare turistike, ku jahtet e miliarderëve ndërkombëtarë nuk janë më rastësi, por një trend i ri i verës 2025./e.t
