Drejtoria e Përgjithshme e Mbrojtjes nga Zjarri dhe Shpëtimin apelon të gjithë qytetarët që të bëjnë kujdes tre ditët në vazhdim, pasi sipas raporteve, parashikohen temperatura të larta ekstreme.
Krahas kujdesit për shëndetin, institucioni thekson se këto temperatura përbëjnë një rrezik të shtuar për shpërthimin dhe përhapjen e zjarreve në zonat pyjore dhe rurale.
Të gjitha strukturat përkatëse – emergjencat civile, shërbimi zjarrfikës, ndërmarrjet publike dhe institucionet lokale – janë në gatishmëri maksimale për përballimin e çdo situate të mundshme, por kërkohet dhe bashkëpunimi i qytetarëve.
Drejtoria e Mbrojtjes thotë se po kryhen patrullime të shpeshta në terren, mjetet zjarrfikëse dhe ndihmëse janë të pajisura dhe të gatshme për ndërhyrje të menjëhershme, si dhe po punohet ngushtësisht me Policinë, mjekët e familjes, si dhe skuadrat vullnetare të emergjencës për çdo situatë.
“Kërkojmë bashkëpunimin e çdo qytetari për të parandaluar situata të rrezikshme: Mos ndizni zjarre në ambiente të hapura dhe Raportoni menjëherë çdo vatër zjarri ose tym të dyshimtë në numrat falas: 128 – Shërbimi Zjarrfikës dhe 112 – Emergjencat dhe Policia”, vijon njoftimi.
Edhe raportet meteorologjike parashikojnë se për ditën e sotme termometri do të shënojë 42 gradë celcius. E njëjta situatë parashikohet dhe për ditët në vazhdim, ndaj kërkohet kujdes i shtuar nga qytetarët për të mos dalë në oraret e pikut./E.T
