Në mëngjesin e 13 gushtit 2025, u shua në moshën 84-vjeçare Rabie Isuf Xhani, mësuesja e parë e fshatit Gizavesh në rrethin e Librazhdit dhe një ndër gratë e para që sfidoi realitetin e kohës për t’u bërë pishtare e dijes në zonat rurale të Librazhdit.
E lindur më 16 prill 1941 në Librazhd-Katund, Rabia u rrit mes sakrificave, pa figurën e të atit, i cili ndërroi jetë kur ajo ishte ende foshnje. E edukuar nga nëna dhe nga dashuria për dijen, ajo përfundoi arsimin 7-vjeçar në qytetin e Librazhdit, duke bërë çdo ditë mbi dy orë rrugë më këmbë.
Në vitin 1959 u martua me Hyqmet Xhanin dhe u vendos në fshatin Gizavesh, ku përkushtimi i saj për arsimimin nuk u ndal. Ajo përfundoi me sukses Shkollën Pedagogjike në Elbasan dhe në vitin 1961 nisi punën si mësuese në shkollën e fshatit, duke hyrë në histori si e para grua mësuese vendase në Gizavesh dhe një nga të parat në gjithë rrethin.
Për 30 vite, Rabia Xhani qëndroi në misionin e saj me përulësi dhe pasion, duke edukuar dhjetëra breza që sot mbajnë me krenari kujtimin e saj si një mësuese shembullore, humane dhe e përkushtuar. Ajo doli në pension në vitin 1991, por mbeti për dekada një figurë tepër e respektuar në komunitetin e zonës .
“Ajo nuk ishte vetëm mësuese për nxënësit e saj. Ishte këshilltare, shpresë dhe mbështetje për një fshat të tërë. Do ta kujtojmë gjithmonë me krenari,” u shpreh një nga familjarët e saj.
Ndërsa një nga ish-nxënësit e saj, tashmë mësues në pension, shton: “Isha vetëm 6 vjeç kur e dëgjova për herë të parë zërin e saj. Më mësoi të shkruaj emrin, por mbi të gjitha më mësoi të besoj te vetja. Falë saj jam ai që jam sot.” Me ndarjen nga jeta të Rabie Xhanit, Librazhdi humbi jo vetëm një arsimtare të palodhur, por një simbol të përparimit dhe emancipimit të gruas shqiptare në dekada të vështira./e.t
