Presidenti rus Vladimir Putin zhvilloi të dielën biseda telefonike me udhëheqësit e Bjellorusisë dhe Kazakistanit për t’i informuar mbi samitin historik me Presidentin e Shteteve të Bashkuara, Donald Trump, të cilin Kremlini e konsideron një hap të rëndësishëm drejt arritjes së paqes në Ukrainë.
Pas takimit në Alaska, i pari mes SHBA-së dhe Rusisë në mbi katër vite, Putin njoftoi zyrtarët e lartë mbi rezultatet e bisedimeve.
Ai e cilësoi samitin si “shumë të dobishëm” dhe theksoi diskutimet për një përfundim të mundshëm të konfliktit në Ukrainë “mbi një bazë të drejtë”, duke nënvizuar rëndësinë e adresimit të “shkaqeve rrënjësore” të krizës.
“Për herë të parë pas një kohe të gjatë zhvilluam negociata direkte në këtë nivel,” tha Putin. “Kjo ishte një mundësi për të shprehur qetësisht dhe me detaje qëndrimet tona.”
Putin gjithashtu theksoi respektin për qëndrimin e administratës amerikane, e cila synon përfundimin e shpejtë të veprimeve ushtarake, duke theksuar se Rusia gjithashtu dëshiron një zgjidhje paqësore.
Në një njoftim për shtyp, administrata e Presidentit bjellorus Aleksandër Lukashenko konfirmoi se Putin e kishte informuar në detaje homologun e tij për rezultatet e samitit në Alaska.
Administrata e Lukashenkos theksoi se dy presidentët diskutuan situatën rajonale duke marrë parasysh rezultatet e bisedimeve të Alaska-s, duke theksuar bashkëpunimin e ngushtë midis aleatëve strategjikë.
Ndërkohë, shërbimi për shtyp i Presidentit të Kazakistanit, Kassym-Jomart Tokayev, vlerësoi se bisedimet ndihmuan në një kuptim më të mirë të qëndrimit rus nga pala amerikane./e.t
