Nëse menduat se politika shqiptare ka prekur kulmin e kodeve politike, prisni pak, sepse tani kemi edhe fiqtë… e Taulant Ballës. Kjo nuk është metaforë, por një foto në Instagram Story, ku Ministri i Brendshëm poston me krenari disa fiq të bukur, të freskët, të pjekur…
Ndalemi pak. Fiqtë, përtej vlerave ushqimore, kanë edhe një ngarkesë politike në Shqipëri. Si mund ta harrojmë Erion Veliajn, i cili për miqtë e rrjeteve sociale quhet “Lali Fiku”? Për disa vite, kryebashkiaku i Tiranës ishte kthyer në simbolin kombëtar të fikut.
Mos ndoshta ky postim i Ballës është një homazh i heshtur për shokun e vjetër të betejave, i cili prej muajsh ka hyrë jo vetëm në qeli, por edhe në një agjërim mediatik dhe një dietë të rreptë heshtjeje? Kjo ndoshta është një thirrje simbolike: “Lali, të kanë marrë fiqtë”.
Këto ditë në SPAK ka nisur të shfaqet edhe Arbër Veliaj, vëllai i Lali Fikut. Po, edhe ai në skenën e madhe të transparencës me regji amerikane. Meqë Lali nuk ka më mundësi të bëjë Story, ndoshta Taulanti po i kujton vëllait të ish-kryebashkiakut se fiqtë janë aty: si mesazh, si paralajmërim, apo si një përshëndetje e koduar: “Mbaje vëllain fort, se fiqtë po piqen”.
Kjo është Shqipëria jonë, ku edhe një frut kthehet në shenjë gjyqi, ku një Story është më shumë se një postim dhe ku gjithçka hahet, përveç drejtësisë. m.p.
