Ukraina u zgjua mes bombardimeve intensive të Rusisë këtë të enjte, të cilat vranë të paktën 17 vetë, përfshirë 4 fëmijë në kryeqytetin Kiev, në një sulm që, sipas presidentit Zelenski, ishte përgjigjja e Moskës ndaj diplomacisë. Që në agim, ekipet e shpëtimit gërmuan përmes godinave të shkatërruara në Kiev, ku trupat u nxorën nga rrënojat. Të paktën 38 vetë mbetën të plagosur në valën e sulmeve që zgjati disa orë dhe që dëmtoi ndërtesa në 7 distrikte të kryeqytetit, përfshirë edhe selinë e misionit të BE-së në Ukrainë dhe atë të Këshillit Britanik.
Përreth vendit, ushtria ukrainase njoftoi se 13 lokacione ishin goditur nga sulmet e Rusisë, përfshirë edhe një kompleks të operatorit ukrainas të energjisë, Ukrenergo. Teksa bëri thirrje për shtim të sanksioneve ndaj Moskës, presidenti Zelenski u shpreh: “Rusia zgjedh raketat balistike në vend të tryezës së negociatave. Vazhdon të vrasë në vend që t’i japë fund luftës”.
Ndërkohë, ministria e Mbrojtjes në Rusi bëri të ditur se kishte goditur infrastrukturë ushtarake-industriale dhe baza ajrore ushtarake. Në Kiev u dëgjuan disa shpërthime të forta, teksa re tymi u ngritën mbi qiellin e natës dhe dronë u panë të vërtiteshin mbi qytet. Kryebashkiaku Vitali Klitçko e përshkroi këtë si sulmin më të madh në Kiev gjatë muajve të fundit.
Europa reagoi me zemërim ndaj aktit të fundit të Rusisë, me Britaninë e Madhe që thirri ambasadorin rus në shenjë proteste. Bashkimi Europian njoftoi një hap të ngjashëm, me shefen e diplomacisë së bllokut, Kaja Kallas, që tha se sulmet kishin treguar se Rusia kishte bërë zgjedhjen për të përshkallëzuar luftën dhe për të tallur përpjekjet për paqen. m.p.
