Gazmend Brakaj, i njohur ndryshe me emrin Gaxhai, ka bërë kërkesë për uljen e dënimit me 90 ditë.
Brakaj ka marrë dy dënime përjetë, për krimet e ‘97 dhe është i burgosur në IEVP-në e Peqinit.
Sakaq, gjyqtarja Çekrezi e pushoi çështjen, lidhur me kërkesën e Gaxhait, pasi nuk u paraqit avokati.
“Gaxhai” i është drejtuar gjykatës së Elbasanit me një kërkesë për ulje dënimi në masën 90 ditore. Kërkesa është depozituar në 6 mars 2020 dhe në datën 8 korrik 2020, gjyqtarja e çështjes Miranda Çekrezi, ka vendosur të pushojë gjykimin për uljen e dënimit të “Gaxhait”, për shkak se nuk ishte paraqitur avokati i tij mbrojtës.
Nëpërmjet këtyre kërkesave për ulje dënimi dhe nëse ato do pranohen nga gjykata, “Gaxhait” shumë shpejt i hapet rruga për të kërkuar lirimin me kusht.
Kujtojmë se llogaritja e dënimit të “Gaxhait” fillon qysh prej datës 29 qershor 1999, kur është arrestuar në Durrës, vetëm pak momente pas vrasjes së dy shokëve të Lulzim Berishës, Ilir Paja dhe Arben Xhunga.
Një ditë më parë ishte Zani Caushi ai që kërkoi lirinë nga burgu, me pretendimin se kishte kryer më shumë se treçerekun e vuajtjes së dënimit dhe donte të punonte për të mbajtur familjen.
Këto kërkesa të dy prej ish-krerëve të bandave rivale dhe më të njohura në Vlorë, vijnë pas disa vendimeve lehtësuese që dhanë gjykatat, për emra të njohur të botës së krimit, siç ishte rasti i freskët ai i Dritan Dajtit, apo më herët për lirimin nga qelia të Lul Berishës dhe Endrit Dokles./Bl.Ba/Fjala.al
