Ngandonjëherë, kapriçot e shortit të një veprimtarie, siç është në rastin aktual, kampionati, të sjellin kundërshtarin më të papërshtatshëm, në momentin më të papërshtatshëm. I tillë duket se është momenti edhe për Kukësin, që, për më tepër, vjen pas eliminimit nga Kupa e Shqipërisë, ku, në gjysmëfinale u mund përballë Teutës së Durrësit. Por trajneri Orges Shehi kërkon ta lërë prapa sa më shpejt zhgënjimin e Kupës.
“Të shtunën rikthehemi në kampionat, që është një tjetër lloj veprimtarie, – ka deklaruar durrsaku i stolit të verilindorëve. – Në Durrës patëm një ndeshje të mirë në tërësi, por futbolli i tillë është, kështu që duhet të përqendrohemi tek ndeshja me Vllazninë dhe jo tek ajo që lamë pas.” E sikur të mos mjaftojë kjo, vjen sfida me kuqeblutë, pikërisht në shtëpinë e këtyre të fundit.
“Jemi në një situatë që kanë mbetur edhe 3 ndeshje dhe do të bëjmë maksimumin ndaj Vllaznisë, – ka thënë ish-portieri i, ndër të tjera, Skënderbeut, Partizanit dhe Teutës. – Jemi ende në lojë për objektivin madhor dhe e dimë që ndeshja e së shtunës ka një shkallë të lartë vështirësie, por do të bëjmë maksimumin tonë.” Megjithatë, Shehi e di se ndeshja e së shtunës ka një faktor të shtuar vështirësie.
Tirana kryeson e shkëputur në kuotën e 69 pikëve, 7 më tepër sesa Kukësi, që duhet të fitojë për ruajtur largësinë pre 4 pikësh e për të mbajtur gjallë shpresat për titull, teksa do të mbeten edhe 6 pikë në lojë. Një humbje e skuadrës së trajnerit Orges Shehi në Shkodër do të shpallte matematikisht Tiranën “kampione”, ashtu sikundër edhe një barazim do të kishte thuajse të njëjtat pasoja.
Por edhe shkodranët, nga ana e tyre, e duan fitoren për të mos iu ndarë Bylisit dhe për të shpresuar ende për të shmangur vendin e 8-të, e bashkë me të, edhe “play-off”-in me më të mirën e vendeve të dyta të Kategorisë së Parë. Ndaj edhe sfida e së shtunës në mbrëmje mbart shumë presion për Shehin dhe lojtarët e tij dhe mbetet për t’u parë sa do ta mbajë skuadra verilindore këtë presion.Ka.Li/fjala.al
