Ka vonuar pak, teksa mund të ishte mbyllur si çështje prej disa javësh, por më në fund është zyrtare. Juventusi është shpallur matematikisht të dielën në mbrëmje vonë, për të 9-in vit radhazi dhe për herë të 36-të në histori, “kampion i Italisë” në futboll. Skuadra e drejtuar nga trajneri Mauricio Sarri mposhti me rezultatin 2-0 Sampdorian duke e çuar diferencën nga Interi i vendit të dytë në 7 pikë.
Me dy ndeshje të mbetura, bardhezinjtë sigurojnë kështu titullin e 9-të “kampion” radhazi, ndërsa heronjtë e triumfit të së dielës ishin Kristiano Ronaldo dhe Bernadeski, të cilët ishin autorë të golave. Madje ylli portugez i torinezëve pati mundësinë të realizonte një dygolësh, por gaboi nga pika e bardhë e 11-metërshit, duke e dërguar topin mbi shtyllën horizontale të portës së gjenovezëve.
Ky është titulli i parë “kampion” që Mauricio Sarri fiton në karrierë si trajner. Ndërkaq, portugezi i Juventusit, Kristiano Ronaldo ka ende mundësi të fitojë çmimin e “Këpucës së Artë” të Serisë A, por edhe të mbarë Evropës, pasi ka realizuar 31 gola dhe ka dy ndeshje në dispozicion për të kaluar Çiro Imobilen dhe Robert Levandovskin, të cilët kanë realizuar 34 gola secili.
