Federata Shqiptare e Futbollit ka bërë të ditur të martën se finalja e Kupës së Shqipërisë në futboll për femra do të luhet ditën e enjte, më 30 korrik 2020, në Stadiumin “Elbasan Arena”.
Sfida Vllaznia-Apolonia do të nisë në ora 19:00 dhe do të përballë dy prej skuadrave më të mira këtë sezon në futbollin e femrave.
Vllaznia, e cila u shpall kampione e Shqipërisë për të shtatin vit radhazi pak javë më parë, erdhi në këtë finale pasi mposhti në gjysmëfinale Juban Danjën me rezultatin 5-1.
Ndërsa, Apolonia eliminoi në katërshe Tirana AS, duke triumfuar me rezultatin e thellë 6-0. Skuadra fierake u rendit e dyta në kampionatin e futbollit për femra që sapo u mbyll.
