Prokuroria e Përgjithshme ka nisur verifikimin për gjurmët e gishtërinjve për kreun e Bashkisë së Mallakastrës, Qerim Ismailajt nëse ka qenë i dënuar më parë në shtetin grek.
Në kërkesën e drejtuar kryebashkiakut, prokuroria saktëson se gjurmët e gishtave fillimisht do t’i merren nga ADISA.
Akuzat
Ishte Partia Demokratike ajo që hodhi në fillim akuzën ndaj Qerim Ismailajt se ky i fundit ishte i dënuar më parë në shtetin grek.
Në dokumentet e publikuara prej saj rezulton se kryebashkiaku i Mallakastrës është dënuar nga gjykata greke, dënim të cilin nuk e ka shënuar në formularin e dekriminalizimit.
Sipas dokumenteve, Qerim Ismailaj rezulton se është dënuar në Greqi me 3 vjet burg.
Partia Demokratike thekson se bëhet fjalë për një dokument-vërtetimi me nr. Protokolli 405 të Prokurorisë pranë Gjykatës së Shkallës së Parë Athinë, ku Qerim Ismailaj, rezulton i dënuar me 3 vjet burgim nga Gjykata e Kios, më datë 25 Shkurt 2000.
Sipas dokumentit, ai është dënuar për kryerjen e veprimeve të dhunshme, plagosje (rrahje) dhe nuk e ka vuajtur dënimin për shkak të mosgjetjes në territorin grek.
Nga ana e tij, Ismailaj i ka hedhur poshtë akuzat, duke thënë se nuk ka qenë i dënuar apo të jetë akuzuar për vepra penale që janë publikuar nga Partia Demokratike. /Fjala.al/
