Përgjigja për deklaratën e kryeministri Edi Rama nga opozita, vjen nga ish- deputetja e PD-së, Jorida Tabaku. Ajo akuzon se qytetarët në Kakavijë janë lënë të braktisur, nga një qeveri dhe një kryeministër që po përpiqet që të marrë benefitet e fundit të pushtetit në ikje. Ajo e mbyll deklaratën e saj me një pyetje, ku thotë se “përse duhet një qeveri që nuk merr përgjegjësi për situata të tilla.
“Sot kryeministri i vendit u përpoq t’i japë orë edukate morale shqiptarëve që vuajnë në lëkurë çfarë do të thotë të jesh pa shtet, pa mbrojtje, të trajtuar si gjedhë sepse më së paku janë braktisur.
Tetë vjet ky njeri që e quan veten kryeministër bën gjueti ku të gjejë fajtorin jashtë, kur nuk e gjen fillon orën e edukatës morale, lëndë që e mëson autodidakt duke bërë prova me durimin e shqiptarëve.
Shqiptarët paguajnë taksë për t’u shërbyer, askund nuk ka lënie në mëshirë të natyrës, as bullgarët as francezët me të cilët guxon t’i krahasojë duke tallur hallin e tyre që po kthehen me shpejtësi në Greqi për të punuar e për të mbajtur edhe familjet në Shqipërinë që e vjel po ky. Ky që e ka lëshuar qeverisjen dhe qeverinë, merr vetëm benefitet e fundit të pushtetit, me PPP, tendera, konçensione dhe privatizim të Shqipërisë! Katër ditë të lënë në rrugë, as dinë pse të kthehen, as nëse duhet të rrinë, ikin e vijnë në sakrificë, vuajtje dhe pasiguri mijëra e mijëra shqiptarë.
Askund si në Shqipëri papërgjegjshmëria dhe braktisja nuk ndodh si me qeverinë e Ramës, as të ikin nuk munden me dinjitet. Për çfarë duhet qeveria nëse nuk ka përgjegjësi dhe nuk merr përsipër asnjë zgjidhje në situata të tilla? Nuk duhet”, shkruan Tabaku,
Kjo vjen si një përgjigje, për shkrimin e bërë nga kryeministri Edi Rama, i cili tha se në këtë situatë nuk kanë faj autoritet shqiptare, por as ato greke.
la.mi/Fjala.al
