Presidenca kroate dhe Komisioni Europian synojnë të bindin të gjitha shtetet anëtare për rëndësinë e hapjes së negociatave të anëtarësimit në Bashkimin Europian me Shqipërinë dhe Maqedoninë e Veriut para samitit të Zagrebit në 6 dhe 7 maj. Në seancën plenare të Parlamentit Europian, kryeministri kroat Andrej Plenkoviç dhe presidentja e Komisionit Europian, Ursula Von der Leyen kanë insistuar sërish mbi rëndësinë e hapjes së negociatave me të dyja vendet.
“Vendet e Europës Juglindore nuk kanë ku të shkojnë tjetër. Ato nuk do bëhen shtete anëtare të Shteteve të Bashkuara të Amerikës, Kinës, apo Rusisë. E vetmja rrugë para tyre është Evropa. Politika jonë duhet të strukturojë këtë marrëdhënie në një mënyrë serioze. Nëse politika jonë krijon përshtypjen se Ballkani Perëndimor do jetë gjithnjë paradhomë e Bashkimit Europian, kjo nuk do jetë e dobishme derklaroi kryeministri kroat, Andrej Plenkovic..
Ndërsa presidentja e Komisionit Europian, Ursula Von der Leyen ka theksuar se brenda disa javësh do të jetë gati një strategji e re për hapjen e negociatave.
“ Që samiti i Zagrebit të jetë një sukses ne duhet të bëjmë përpjekjet tona. Ndaj, ne do të paraqesim një strategji të re brenda disa javësh, në mënyrë që të diskutojmë modernizimin e procesit të zgjerimit, por pjesa më e rëndësishme është që t’u japim miqve tanë të Maqedonisë së Veriut dhe Shqipërisë një perspektivë për hapjen e negociatave. Ata kanë përmbushur kushtet që u kemi kërkuar, ndaj tani është koha për ne që t’u japim një perspektivë të vërtetë”.
Për këtë qëllim, presidenca kroate, Komisioni Europian kanë mbështetjen e shumicës së shteteve anëtare dhe shumicës së dërrmuese të Parlamentit Europian, me përjashtim të grupimit të ektremit të djathtë.
“Ne jemi shprehur qartë, që vendimi i këshillit Europian për mos hapjen e negociatave me Maqedoninë e Veriut dhe Shqipërinë ishte një vendim dritëshkurtër. Ne shpresojmë që grupimi socialist do të flasë me miqtë e tyre danezë, që grupimi i liberalëve do të flasë me Francën dhe që do të bindin ato shtete anëtare që hezitojnë ende për rëndësinë e hapjes së negociatave me dy vendet”, deklaroi kryetari i grupit EPP në PE, Manfred Weber.
