Nga Gazment Bakiu
Më 22 shtator 2020, presidenti dekoroi Avni Rustemin. Si shumë të tjerë, unë mendoj se nuk duhej ta dekoronte, por gjithsesi presidenti flet politikisht edhe kur bën dekorime dhe politikanët historinë rëndom e shohin në funksion të politikës.
Nga ana tjetër, nëse vini re reagimet, konstatoj se në shumicë, shqiptarët e quajnë Avniun hero dhe Esatin tradhtar. Dhe normale, përderisa tekstet e historisë vazhdojnë të bëhen sipas modelit të sistemit të kaluar me heronj dhe me tradhtarë, përderisa vrasësi (“në emër të popullit”) Avni vazhdon të ketë bust e shesh në mes të Tiranës e gjetkë, përderisa zyrtarisht Avniu është hero. Shtoni këtu që ne si popull jemi fort mbrapa në mendësi… na eksitojnë vrasësit, vrasjet dhe dhuna…
Ne vendin tonë deri më 1990-n mbaheshin bustet e Stalinit, kur e gjithë Lindja kishte dënuar krimet e tij, që më 1956-n… Duket si pa lidhje kjo, por tregon se ku kemi qenë e nga vijmë… prandaj jemi sot ashtu si jemi, në shumë drejtime…
Nganjëherë çuditem si ra komunizmi si sistem këtu, bashkë me shtatoren e Enverit te sheshi, mirëpo prapë fotot e tij shfaqen plot nostalgji…
Prandaj, Avniu do të vazhdojë të jetë hero (me një dekoratë më shumë), por patjetër do të vijë një ditë që s’do të jetë më… sepse historia e personazheve në fjalë është sqaruar në disa libra nga autorë seriozë, por njohja e së vërtetës është një proces i gjatë kundër indoktrinimit dhe trushpëlarjes…
Mendoj se fatkeqësisht jemi popull i vonuar… dëmi që bëri diktatura me Njeriun e Ri duhet nja 200 vjet që të zhbëhet… Nëse koha do të jetë më e shkurtër (këtë uroj) kjo varet nga ne…
Shënim. Thjesht kam dhënë mendimin tim, por ju lutem shmangni fyerjet për këdo, sepse në të kundërt komentet do të fshihen.
La.Mi/Fjala.al
