Krutanët e trajnerit Ndreu firmosin edhe me Rezin dhe me Shkallën. Kastrioti është një nga dy skuadrat që siguroi sezonin e shkuar ngjitjen në nivelin më të lartë të Kampionatit Kombëtar të Futbollit, në Kategorinë Superiore dhe skuadra e drejtuar nga trajneri Ramadan Ndreu i është nënshtruar një shndërrimi rrënjësor.
Janë plot 10 lojtarët që janë afruar dhe më konkretisht janë dy brazilianët, mesfushori Moraesh dhe sulmuesi Silva, mesfushorët Silvio Vokrri dhe Fjoralb Deliaj, portieri Alesio Abibi, sulmuesit Redon Danaj, Sebino Plaku dhe Ermir Rezi, dhe mbrojtësit Realf Zhivanaj dhe Silvester Shkalla.
Ky i fundit ka qenë edhe emri më i ri që i është shtuar ekipit krutan të martën pasdreke, më pak se 24 orë pasi kishte nënshkruar gjithashtu për një vit edhe futbollisti me përvojë, Ermir Rezi. Sulmuesi, i cili në sezonet e fundit ka qenë pjesë e Dinamos, Kamzës dhe së fundmi Erzenit, në sezonin e ri do të jetë pjesë e Kastriotit.
Ndërkaq, në kuadër të përgatitjeve për sezonin e ri, krutanët do të zhvillojnë të mërkurën, më 7 tetor 2020, duke nisur nga ora 13:00, një miqësore me Skënderbeun. Kjo miqësore do të luhet në fushën e kampit stërvitor të Kombëtares në Durrës dhe vjen teksa të gjitha skuadrat janë ende në pritje të nisjes së sezonit të Kategorisë Superiore, të mbetur pezull për shkak të bojkotit të Ligës Profesioniste.
La.Mi/Fjala.al
