Triumfon në Nyrburgring dhe barazon Mikael Shumakerin për numrin e fitoreve. Në atë që ishte një garë historike, Ljuis Hemiltoni ka barazuar rekordin historik të Mikael Shumakerit sa u përket garave të fituara në Formula 1, duke ngadhënjyer në garën e Nyrburgringut. Ndërsa finlandezi Kimi Raikonen u bë piloti me më shumë gara të zhvilluara në Formula 1.
Ljuis Hemiltoni ka barazuar rekordin historik të Mikael Shumakerit sa u përket garave të fituara në Formula 1, duke ngadhënjyer në Çmimin e Madh të Eifelit, ndaj Maks Verstapenit, ndërsa Valteri Botas u tërhoq për shkak të një problemi mekanik.
Ndërkaq, Daniel Riçardo plotësoi podiumin me “Renault” e tij, duke lënë prapa pilotin e “Racing Point”, Serxhio Perez, pasi një futje e vonshme në pistë e makinës së sigurisë, e prishi atë që mund të kishte qenë një betejë e ethshme midis dyshes së kreut në xhirot e fundit. Në atë që ishte një nisje e luftuar fort, Hemiltoni u mundua ta parakalonte shokun e tij të skuadrës, Botas, ashtu sikundër kërkoi të bënte dhe piloti i “Ferrari”-t, Sharl Lëklerk, në dëm të atij të “Red Bull”-it, Verstapen, por pa sukses dhe finlandezi i “Mercedes”-it vijoi ta thellonte, madje, deri në 2 sekonda kryesimin, por deri në xhiron e 13-të, kur pati probleme me gomat.
Duke vijuar të ketë disa xhiro më vonë edhe probleme me motorin dhe duke u tërhequr nga gara. Por futja dhe mbajtja e makinës së sigurisë deri në xhiron e 50-të, me Hemiltonin dhe Verstapenim që ankoheshin për shpejtësinë e saj, bëri që të dy të vuajnë për të mbajtur të ngrohta gomat në pistën e ftohtë të Nyrburgringut. Megjithatë, në 10 xhirot e fundit, Hemiltoni ia doli ta mbajë prapa Verstapenin, i cili nga ana e tij bëri të njëjtën gjë me Riçiardon, i cili siguroi sidoqoftë podiumin e parë që nga ai Çmim i Madh i Montekarlos në 2018-ën.
Dhjetëshen e të parëve e plotësuan Serxhio Perezi, Karlos Sainzi, Pjer Gasli, Sharl Lëklerku, Niko Hulkenbergu, Romën Groszhoni dhe Antonio Xhovinaci, ndërsa Sebastian Feteli mbeti në vendin e 11-të dhe jashtë zonës së pikëve./Jo.Be/Fjala.al
