Ministri i Brendshëm Sandër Lleshaj zhvilloi një mbledhje me drejtuesit e sektorit të Policisë Rrugore në Shqipëri, në kuadër të zbatimit të masave për rritjen e sigurisë në rrugë.
Në fillim të takimit, Drejtori i Përgjithshëm i Policisë së Shtetit Ardi Veliu, prezantoi të dhënat 9-mujore ku bien në sy ulja e numrit të përgjithshëm të aksidenteve, numrit të viktimave, të plagosurve rëndë etj.
“Në qoftë se do t’u referohemi treguesve krahasimorë për vitin 2020 dhe të njëjtës periudhë të vitit 2019, konstatojmë se kanë ndodhur 985 aksidente rrugore, me 141 të vrarë, 143 të plagosur rëndë dhe 988 të plagosur lehtë.
Krahasuar me të njëjtën periudhë të vitit 2019 kemi, më konkretisht 233 aksidente rrugore më pak, ose -18 % më pak se e njëjta periudhë e vitit të kaluar; 19 të vrarë më pak, ose -12 % në krahasim me të njëjtën periudhë të vitit të kaluar; 64 të plagosur rëndë më pak, ose -33%, dhe 324 të plagosur lehtë, më pak, ose -26%”, tha Veliu.
Ndërsa ministri i Brendshëm Sandër Lleshaj gjatyë fjalës së tij, theksoi se ndryshimet që do të bëhen në Kodin Rrugor do të rrisin më shumë përgjegjësinë dhe se mund të parandalohen shkeljet rrugore.
“Kemi deklaruar që 2020 është viti i rëndësishëm për sigurinë rrugore, me objektivin për të ulur numrin e aksidenteve. Duhet thënë që treguesit këtë vit janë pozitivë. Përgjegjësi e jona të denoncojmë dhe hetojmë dhënien e kolaudimeve të parregullta. Kanë dhe kolaudime në rregull por makina nxin gjithë lagjen me tym.
Dhe atje në dokumente dalin në rregull. Siguria në qarkullim varret nga shumë gjëra”, u shpreh Lleshaj.
Ndër të tjera ai cilësoi si të rëndësishme edhe sjelljen në rast aksidenti. “Si sillemi në aksident? Dihet që aksidentet prodhojnë pasoja. Por trajtimi i tyre është shumë i rëndësishëm, që mund t’i zbusë dhe rëndojë. Ruajtja e vendit, masa me rëndësi jetike që çojnë në reduktimin e fataliteteve.
Mund të sjellë kursim jetësh njerëzore. E shihni përditë se si udhëtohet në Shqipëri. Gjendja është e rëndë, kur një person blen biçikletë duhet të blejë edhe mjetet mbrojtëse. Duhet një ndërgjegjësim i qytetarëve. Pavarësisht masave dhe ndëshkimeve, shifrat mbeten ende të larta”, tha Lleshaj.
Sakaq brenda pak javësh, në Kuvend pritet të shkojë paketa me ndryshime në Kodin Rrugor, e cila parashikon ashpërsimin e masave për një sërë shkeljesh./Bl.Ba/Fjala.al
https://www.facebook.com/policiashtetitshqiptar/posts/2892646671021685
