Komisioneri Evropian Për Zgjerimin Oliver Varhelyi ka reaguar pas deklaratës së presidentit Ilir Meta, i cili në lidhje me ndryshimet në Kodin Zgjedhor i është drejtuar Komisionit të Venecias.
Varhelyi përmes një postimi në rrjetin social Twitter shkruan se përgjigja nga Venecia do të jetë e shpejtë.
Ndër të tjera në reagimin e tij komisioneri ka kërkuar nga parlamenti që të presë opinionin e Venecias në lidhje me ndryshimet në kodin Zgjedhor.
“Unë besoj se Komisioni i Venecias do të japë këshilla të shpejta për palët e interesuara mbi zbatimin e Ndryshimeve Kushtetuese të 30 korrikut.
Parlamenti duhet të marrë në konsideratë këtë këshillë. Mezi po pres për të parë zgjedhjet të lira dhe të ndershme në prill 2021”, shkruan Varhelyi.
Kreu i shtetit u shpreh më herët se i janë drejtuar “Venecias” me 12 pyetje, ndërsa kërkojnë një opinion urgjent për ndryshimet që u bënë në Kodin Zgjedhor, të cilat Meta i cilëson të njëanshme.
“Besoj se jeni njohur të gjithë me dekretin për kthimin e ndryshimeve të Kodit Zgjedhor. Mendoj se është momenti i duhur për t’ju bërë të ditur juve dhe opinionit edhe kërkesën e presidentit për një opinion urgjent për ndryshimet e njëanshme drejtuar komisionit të Venecias. Me qëllim që të sigurohen standardet minimale të zgjedhjeve veçanërisht sistemi i kontrollit është jofunkisonal”, tha Meta.
Presidenti Meta ktheu për rishqyrtim në Kuvend ndryshimet në Kodin Zgjedhor të miratuara më herët vetëm me votat e mazhorancës si edhe të disa deputetëve nga opozita parlamentare./Bl.Ba/Fjala.al
