Gjykata e Apelit urdhëroi ditën e hënë lirimin e biznesmenit Isuf Berberi, i përfshirë në dosjen e prokurorisë për abuzimet pranë AKBN-së.
Ai është bashkëpronar i kompanisë së hidrokarbureve “Phoenix Petroleum”. Ai u arratis ditën që do të ekzekutoheshin urdhër-arrestet, por tanimë është Gjykata e Apelit që heq masën e sigurisë ndaj tij.
Në dosjen hetimore për zyrtarët e AKBN që u arrestuan disa ditë më parë, thuhet se kompania amerikane “Black Swan Energy Services”, i dërgoi email ministrit Damian Gjiknuri dhe disa krerëve te institucioneve përgjegjëse, duke bërë të ditur se bosët e “Feniks” kishin falsifikuar tetë fatura me vlerë 1.3 milionë dollarë, për shërbime që nuk i kishin marrë prej tyre.
Drejtorja ekzekutive e kompanisë amerikane, Eva Peza, ka konfirmuar se është në dijeni të situatës me shoqërinë “Feniks Petroleum” sh.a., faturat e së cilës arrijnë shumën 1.290.000 USD. Kjo shtetase ka konfirmuar se faturat janë të falsifikuara, pasi “Blac Swan Energy Services” (BSES) nuk ka punuar asnjëherë për këtë shoqëri.
Zonja Peza sqaron se përfaqësuesit e “Feniks” kërkuan prej tyre për të bërë tetë vlerësime rezervuarësh dhe plane biznesi, por duke qenë se ata i zvarrisnin gjërat, kompania që ajo përfaqëson nuk iu dha shërbime. Madje, drejtorja ekzekutive ngre dyshime se ata i kopjuan firmën dhe ia përdorën për faturat e falsifikuara.
Për këtë të fundit, Peza ka informuar përmes një emaili të datës 17 maj 2016 ministrin Gjiknuri, por nuk del qartë nëse ky i fundit ka ndërmarrë ndonjë veprim lidhur me skandalin.
Nga hetimet e Prokurorisë, të nisura pas kallëzimit të bërë nga drejtori i Albpetrol, rezulton se shoqëria “Fenix” nuk ka të regjistruar në kontabilitetin e saj asnjërën nga 8 faturat e listuara dhe as ndonjë faturë tjetër të lëshuar nga shoqëria “Black Swan Energy Services”, si dhe nuk ka kryer asnjë transaksion bankar me këtë shoqëri.
“Nga ky fakt rezulton se përfaqësuesit e shoqërisë kanë pasur dijeni se ato janë të falsifikuara dhe i kanë përdorur vetëm në marrëdhënie me Albpetrolin dhe AKBN me synimin e qartë për të evituar ekzekutimin e Garancive Bankare të depozituara pranë AKBN”, theksohet në dosje.
Kujtomë se skandali i falsifikimeve të kësaj kompanie çoi në arrestimin e tetë zyrtarëve, ndërsa Berberi u shpall në kërkim.
Pa.Va/Fjala.al
