Kremlini ka mohuar deklaratat e mediave në Britani se presidenti rus, Vladimir Putin, do të largohet nga posti për shkak të problemeve shëndetësore.
Deklarata erdhi pasi The Sun, duke cituar burime, raportoi se Putin ka shfaqur simptoma të mundshme të sëmundjes së Parkinson dhe se po planifikon të largohet.
Sipas tabloidit, vëzhguesit studiuan pamjet e fundit ku Putin dukej si të ishte në dhimbje dhe se trupi e tij ishte në lëvizje të vazhdueshme e të pakontrollueshme.
Në duar mbante një kuti e cila besohet se mbante medikamente kundër dhimbjes.
Raporti i The Sun vjen pas propozimit të një ligji i cili do t’u sigurojë presidentëve rusë imunitet nga ndjekja penale gjatë gjithë jetës së tyre dhe jo vetëm gjatë të qenurit në detyre.
Ky projektligj do t’i jepte mundësi Putinit ”të sëmurë” të pushonte më në fund, duke hequr dorë nga politika më herët, pa pasur frikën e burgosjes.
Megjithatë, zyrtarë të Kremlinit kanë mohuar këto pretendime duke thënë se presidenti është në gjendje të shkëlqyer shëndetësore.
I botuar në një faqe online të qeverisë, ky është një nga disa projektligjet që janë prezantuar pas reformave kushtetuese, që ndër të tjera lejojnë Putinin të kandidojë përsëri.
Putini u zgjodh për herë të parë si president i Rusisë në vitin 2000. Ai ka shërbyer më gjatë se çdo politikan rus ose sovjetik që nga fillimi i viteve 1950 dhe mund të jetë në rrugën e duhur për të qenë një nga udhëheqësit më jetëgjatë të kombit të tij. /Re.D/Fjala.al
