Kreu i Partisë Demokratike, Lulzim Basha ka reaguar pas numrit të lartë të viktimave të raportuara ditën e martë, duke u shprehur se numrat e fshehur nga qeveria sipas tij, janë shumë më keq.
Në një postim në facebook, Basha shkruan se qytetarët e Shqipërisë janë ata që po e paguajnë çmimin e papërballueshëm.
“U takova sot me një grup nga mjekët tanë të mrekullueshëm. Ata janë në vijën e parë të luftës me COVID. I përgëzova për përpjekjen e tyre për të shpëtuar jetë. Mjekët tanë përballen heroikisht në këtë betejë, edhe pse nuk marrin thuajse asnjë ndihmë nga qeveria.
Ata më përshkruan një realitet shumë shqetësues. Sot, një numër rekord vdekjesh janë regjistruar në Shqipëri që nga marsi. Fatkeqësisht, numrat e vërtet që fsheh Rama janë shumë më keq.
Shqipëria hyri në krizën e COVID në një situatë të vështirë, pas 7 vitesh përgjatë të cilave Rama e gjunjëzoi ekonominë dhe rrënoi sistemin tonë shëndetësor. Qytetarët e Shqipërisë janë ata që po e paguajnë çmimin e papërballueshëm. Shqipëria ka nevojë për një qeveri funksionale që punon për njerëzit dhe kujdeset për ta. Është në dorën tonë ta bëjmë realitet këtë.”, shkruan Basha.
Kujtojmë që në vendin tonë është shënuar një rekord prej 19 viktimash dhe 744 rastesh të reja pozitive. Kryedemokrati Basha ka shkëmbyer shpesh replika me mazhorancën dhe kryeministrin Rama. Ai pretendon se numri real i viktimave nuk raportohet nga qeveria, ndërkohë që kreu i qeverisë i ka konsideruar këto akuza antidemokratike dhe çnjerëzore.
Pa.Va/Fjala.al
