Pas betimit të 8 prokurorëve të SPAK tek Presidenti i Republikës, Ilir Meta, ka reaguar ambasada e SHBA-ve në Tiranë. Në një postim në Facebook, ambasada ka përgëzuar prokurorët për detyrën e re dhe e ka cilësuar ngritjen e Strukturës së Posaçme, si një hap themelor për Shqipërinë drejt zhvillimit demokratik dhe ligjor.
“Shtetet e Bashkuara përgëzojnë tetë prokurorët të cilët u betuan këtë mëngjes si anëtarët e parë të Zyrës së Prokurorisë së Posaçme, duke shënuar një hap të rëndësishëm në themelimin e Strukturës së Posaçme Anti-Korrupsion dhe Krim i Organizuar (SPAK).
Nga dita e sotme, Shqipëria ka një organ prokurorësh të angazhuar për të identifikuar, hetuar dhe vënë përpara drejtësisë zyrtarë të kaluar apo aktualë dhe bosë të krimit – individë që në kohët e vjetra janë konsideruar si të paprekshëm.
Ndërsa Shqipëria nis një fazë të re të zhvillimit të saj demokratik dhe ligjor, Shtetet e Bashkuara do të mbeten një partner i palëkundur në mbështetje të SPAK dhe të të gjithë atyre që kërkojnë ti japin fund pandëshkueshmërisë dhe të sjellin drejtësi për popullin shqiptar”,- thuhet në postimin e ambasadës amerikane./Fjala.al/
