Kategoria Superiore e Kampionatit Kombëtar të Futbollit ka luajtur të mërkurën ndeshjet e javës së tij të 4-t dhe Teuta ka arritur ta ndalë në një barazim pa gola Vllazninë në duelin më të spikatur të kësaj jave. Shkodranët e drejtuar nga trajneri gjerman, Tomas Brdariç, vazhdojnë të udhëheqin të pamposhtur në këto javët e para, duke marrë kështu një tjetër rezultat pozitiv në një vizitë të vështirë si ajo e Durrësit.
Nga ana tjetër të besuarit e Edi Martinit, edhe pse me një lojtar më shumë për 20 minuta, nuk arritën të zhbllokonin sfidën, duke u larguar nga fusha me vetëm 1 pikë. Ndërkaq, në takimin tjetër të mbrëmje, sfida Kukësi-Laçi është mbyllur me fitoren minimale të verilindorëve, që ngadhënjyen me golin e Agim Ibraimit, duke arritur të marrin triumfin e parë në kampionat për këtë sezon.
Nga ana tjetër, Laçi shpërdoroi shumë ndaj nënkampionëve të Shqipërisë, edhe kishin rastet më të mira për shënim. Pas 4 ndeshjesh, ekipi i Cungut ende nuk gjen fitore duke mos dalë nga kriza e fillimit të këtij kampionati. Para fillimit të takimit, lojtarët e Kukësit i kanë dhënë trajnerit të tyre Skënder Gega një mesazh inkurajues, pasi ky është dërguar me urgjencë në Turqi teksa është rënduar gjendja e tij shëndetësore prej virusit korona.
Tri takimet e para janë luajtur pasdreke dhe Kastrioti ka korrur fitoren e 3-të në këto 4 javë të para të këtij sezoni të Kategorisë Superiore, teksa ka mundur 2-1 Skënderbeun në takimin e luajtur të mërkurën në Korçë. Skënderbeu mbetet në kuotën e 4 pikëve të marra në po aq ndeshje, ndërsa krutanët kanë grumbulluar 8 nga 12 të mundshme, por vijojnë të mos e njohin humbjen.
Ndërkaq, Partizani ka bindur ditën e mërkurë në vizitën e Fierit ndaj Apolonisë, teksa ka fituar me rezultatin 3-0. Në “Loni Papuçiu”, pjesa e parë ishte me të vërtetë spektakolare, ku të dyja ekipet kishin disa raste për shënim. Vendasit iu afruan disa herë golin, por atë e gjetën të kuqtë, të cilët shënuan në minutën e 42-të, me anë të Enea Bitrin.
Pjesa e dytë foli e gjitha për Partizanin, që shënoi edhe dy herë të tjera, fillimisht me Bardhin në minutën e 58-të dhe më pas me Idrizajn në minutën e 81-të. Një fitore e rëndësishme për të kuqtë e trajnerit Ilir Daja, të cilët regjistrojnë fitoren e dytë në kampionat, duke shkuar në kuotën e 7 pikëve dhe në vendin e 3-të, ndërsa Apolonia qëndron e parafundit me vetëm 2 pikë.
Dhe, së fundi, ka ardhur një tjetër rezultat zhgënjyes për Tiranën. Kampionët në fuqi të Superiores nuk kanë shkuar më shumë se barazimi 0-0 ndaj Bylisit. Një përballje që mund të kishte qenë edhe më dramatike për skuadrën e trajnerit Nevil Dede, teksa në minutat e fundit të ndeshjes, ballshiotët goditën shtyllën me anë të sulmuesit Laval. Pavarësisht përpjekjeve të shumta, bardheblutë nuk arritën të bindnin plotësisht si me rezultat ashtu dhe me lojë.
l.m/Fjala.al
