Apolonia në kërkim të një trajneri të ri pas tërheqjes së italianit, Çoçlli, përkohësisht në krye. Pas Armando Cungut, duket se sezoni i ri i Kategorisë Superiore ka bërë “kurban” një tjetër trajner.
Humbja 1-6 që ka pësuar në Laç përballë skuadrës vendase, në takimin e vlefshëm për javën e 5-të të Kategorisë Superiore, ka çuar në largimin e trajnerit të Apolonisë, Xhovani Kolela. Burime zyrtare të klubit fierak kanë pohuar për Fjala.al, se italiani ka pasur të të hënën me drejtuesit, ka paraqitur dorëheqjen dhe kjo e fundit është pranuar nga presidenca.
Drejtori Ekzekutiv, Olsi Bregu, ka konfirmuar, nëpërmjet linjës telefonike se dorëheqja e trajnerit është pranuar nga drejtuesit e klubit fierak, edhe pse presidenti i Apolonisë, Koço Kokëdhima, ndodhet në Turqi, i shtruar në një spital ku po kurohet për pasojat e infektimit me “Covid-19”.
Bregu ka sqaruar për RTSH Sport se Kolela do të rikthehet në detyrën e drejtorit të Akademisë, ndërsa deri në emërimin e trajnerit të ri, Apoloninë do ta drejtojë Nikolin Çoçlli. Duket se drejtuesit e klubit fierak nuk duan të nxitohen në emërimin e pasardhësit të Kolelës.
Por duket e sigurtë tashmë se ai do të jetë një trajner shqiptar. Një emër që po përflitet në mjedisin fierak është ai i Artan Merxhushit, trajnerit që e riktheu skuadrën në Superiore pas 5 vitesh, por kryeqytetasi sapo ka marrë drejtimin e Besës së Kavajës dhe kthimi i tij në Fier duket i vështirë.
Pas 5 javësh kampionat, Apolonia ka marrë vetëm dy pikë nga 15 të mundshme, pas barazimeve ndaj Bylisit dhe Kastriotit, si dhe humbi kundër Vllaznisë, Partizanit e Laçit, çka çoi edhe në dorëheqjen e italianit Xhovani Kolela.
l.m/Fjala.la
