Sazan Goliku, autor i njohur për larminë krijuese në shumë gjini letrare dhe veprimtari të gjatë krijuese, sapo ka dalë para lexuesve me librin e tij më të ri me poezi “Gjysmëdielli”, botuar nga “Emal”. Ky është libri i njëmbëdhjetë me poezi i autorit. Në 134 faqet e librit paraqiten 107 poezi nga krijimtaria e viteve të fundit, ndarë në 7 kapituj: Përsiatje symbyllur, Ironi heroike, Perëndia e mjegullës, Ky numër nuk ekziston, Pas gjakut të derdhur, Fundjeta, Frymëzime.
Karakteristike e poezive të Sazan Golikut është se motivet e veta poetike i qëmton brenda realitetit që e rrethon autorin, mjedisin shoqërore, në hapësirat ku lëviz dhe në shqetësimet qytetare. Pa dyshim është e vështirë që me pak fjalë të tregohet hapësira ku ai kërkon e mediton, gjen subjekte, situata ose karaktere e megjithatë përafërsisht mund të jepet një pamje e se tërës, poeti gërsheton realitetin qe e prek me dorë me nocione filozofike. Poezitë e tij kanë një taban të fortë jetësor ku ai kërkon e mediton, shpreh dëshira reale dhe utopike, ndër këto vihen re edhe poezitë kushtuese për miqtë artistë që janë ose nuk janë më në këtë botë. Kapur fort pas trungut mëmëdhetar, poezia e Sazan Golikut, krejt natyrshëm, bëhet pjesë e shpirtit njerëzor të kohës kur jetojmë.
K.Traboini
