Ndonëse në një moment të caktuar u duk si një “betejë e humbur”, ka ardhur më në fund ehe lajmi që e prisnin të gjithë te Partizani. Gjykata e Arbitrazhit Sportiv (CAS) në Lozanë të Zvicrës ka vendosur të heqë pezullimin e merkatos së të kuqve kryeqytetas lnë lidhje me çështjen e transferimit të Erald Çinarit. Me anë të një postimi në faqen zyrtare në rrjetin social “Facebook”, Partizani ka dhënë lajmin e mirë për gjithë tifozerinë e vet.
Klubi kryeqytetas tani mund të ndërhyjë në merkato që në këtë dimërore që sapo ka nisur, diçka që do e bëjë më në fund për t’i dhuruar trajnerit Ilir Daja një ekip sa më të fortë teksa janë luajtur 12 javët e para të Kategorisë Superiore. “Klubi njofton se sot është bërë me dije nga CAS për heqjen e pezullimit të sesionit të transferimit të lojtarëve, vendim që ishte në fuqi nga FIFA në lidhje me çështjen e sulmuesit Erald Çinari”, – thuhet në postimin e të kuqve kryeqytetas.
“Klubi saktëson se ky është një njoftim paraprak, deri në zbardhjen e plotë dhe përfundimtare të vendimit që ka marrë CAS, përmes të cilit do të përcaktojmë dhe hapat e mëtejshëm që do të ndërmerren në lidhje me këtë çështje. Nga ky moment tashmë FK Partizani rifiton të drejtën për të operuar në merkaton e janarit“, – përfundon njoftimi në fjalë. Partizani kishte hapur një proces gjyqësor në CAS kundër NK Istra, FIFA-s, Vllaznisë dhe Erald Çinarit.
Kjo për shkak se FIFA kishte vendosur t’u mbyllte merkaton dhe i kishte gjobitur me 83 mijë euro (gjobë që duhet të paguhet së bashku me futbollistin), pasi shkodrani kishte firmosur dy kontrata. Gjyqi është zhvilluar në mesin e dhjetorit dhe Partizani ka dalë sot me njoftimin që shpjegon edhe vendimin përfundimtar. Vendimi i CAS-it është një lajm i mirë edhe për Vllazninë, e cila detyrohej të paguante diçka më tepër se 8,000 Euro në këtë mes.
