Skuadra e Partizanit është duke kaluar një periudhë shumë të vështirë duke humbur sot për të gjashtën herë radhazi. Disfata në ndeshjen për Kupën e Shqipërisë, ndaj skuadrës së Besëlidhjes së Lezhës me rezultatin 0-3 kanosi akoma më shumë gjendjen te “Demat” e kryeqytetit.
Tifozeria e të kuqve të kryeqytetit ka shpërthyer ndaj kësaj gjendjeje të skuadrës, të cilën e quajnë të palejueshme për kampionët e Superligës.
Në lidhje me këtë situatë ka reaguar edhe djali i ish trajnerit të shkarkuar të Partizanit, Franko Lerdës, Mattia Lerda, i cili ka thënë se larguan atë që u mësoi se çfarë ishte futbolli e mbajtën persona që po i vjedhin.
“Bravo, kritikuat atë që u mësonte se çfarë ishte futbolli. Në vend që të mësonit, kritikonit dhe vetëm kritikonit. Vazhdoni kështu sepse futbolli shqiptar po rritet. Mbajtët persona në staf që mendojnë vetëm për të mirën e tyre dhe për të marrë para nga Gazi. Ata flasin shumë, por nuk vlejnë asgjë. Ky është fundi që keni zgjedhur. Bravo! Nuk e kuptuat se skuadra ishte ndër vendet e para sepse kishte një trajner që të tjerët nuk e kanë. E përzutë dhe ja ku erdhi katastrofa. Kampionë, kampionë, kampionë… Çdo vit nis nga zero. Tirana dhe Kukësi janë skuadra shumë të forta dhe asgjë nuk është e garantuar. Mendjemadhësia ju solli në këtë pikë…”,-shkruhet në komentin e djalit të Franko Lerdës./Fjala.al/
