Mateo Shuli është 12 vjeç. Ai është fëmijë me aftësi ndryshe dhe mëson në shkollën ‘Zëra Jete’ në Elbasan. 2 muaj më parë Mateo takoi rastësisht në një aktivitet Kryetarin e Grupit Parlamentar Socialist Taulant Balla dhe i kërkoi ndihmë për rikonstruksionin e shtëpisë.
Shtëpia e familjes Shuli në Kusarth ishte dëmtuar nga një stuhi dhe ishte thuajse e pabanueshme. Balla premtoi rikonstruksionin e saj dhe me ndihmën e disa sipërmarrësve tashmë Mateo dhe familja e tij kanë një banesë në kushte optimale.
Balla sot vizitoi familjen Shuli teksa u shpreh i emocionuar që dëshira e djalit, për të jetuar si gjithë të tjerët u plotësua. Balla tha se detyra e qeverisë është t’u garantojë kushte të barabarta mësimi dhe zhvillimi të gjithë fëmijëve.
Shtëpia e familjes Shuli tashmë do të mobilohet ndërsa Balla bëri një paralelizëm.
‘Kjo është arsyeja që Partia Socialiste kërkon mandatin e tretë. Shqipërinë e ndërtuam, njësoj si shtëpinë tuaj, tashmë duhet ta mobilojmë atë.’
Por për të arritur të gjitha këto, Balla tha se nuk ka kohë për gjumë e llafe, por puna duhet të vijojë çdo ditë.
Balla gjithashtu falenderoi edhe gazetarët e Elbasanit që u bënë zëri i familjes Shuli dhe mbështetën Mateon në kauzën e tij të drejtë.
