Policia ka nisur procedimin penal për dy shtetaset E.L dhe I.L, pasi nëpërmjet rrjeteve sociale dhe medias së shkruar, kanë përhapur informacione të rreme për shtetasen Migena Qato, me detyrë mjeke. Punohet për sqarimin e rrethanave të ngjarjes.
Njoftimi i Policisë:
“Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes. Materialet i kaluan Prokurorisë së Rrethit Gjyqësor Tiranë, për veprime të mëtejshme”.
Motrat Lalo thanë në një intervistë të dy ditëve më parë në Fax news, se babai i tyre ishte lënë pa shërbim në një karrige në spitalin Infektiv, dhe mjekja Qato i kishte gënjyer pasi nuk i kishte kryer asnjë ekzaminim me skaner. Motrat thanë më tej se spitali i kishte penguar që ta transportonin babanë e tyre në një spital jashtë vendit, dhe ai ndërroi jetë pak orë pasi u shtrua në Infektiv, edhe pse gjendja e tij nuk kishte qenë ajo për ta futur në intubim.
Ky është rasti i parë që nga nisja e pandemisë, që familjarë të pacientëve procedohen penalisht për shkak të pretendimeve të tyre për kushtet në spitale. Rastin e Rifat Lalos e komentoi dje dhe kryeministri Edi Rama, i cili edhe më parë se Policia tha se e vërteta nuk ishte ajo që tregonin ”dy vajzat që qanin në gardhin e spitalit babanë e tyre, por ajo që u tha në një deklaratë të orëve të mëvonshme nga ana e QSUT”.
