Një gjykatë në Malajzi përmbysi një politikë të qeverisë, të vjetër me dekada, e cila i ndalon josmyslimanët të përdorin fjalën “Allah” për t’iu referuar Zotit.
Vendimi i Gjykatës së Lartë në Kuala Llampur është pjesë e një rasti të ngritur nga Jill Ireland, një e krishterë malajziane.
Trembëdhjetë vjet më parë, zyrtarët në aeroport i konfiskuan asaj disa materiale fetare që përmbanin fjalën “Allah”.
Ireland, pjesëtare e një grupi autokton, nisi më pas sfidën ligjore kundër ndalesës, e cila daton nga viti 1986.
Pas shtyrjeve të vazhdueshme, Gjykata e Lartë ka dalë në krah të saj, duke konstatuar se ajo ka të drejtë të mos përballet me diskriminim, për shkak të besimit të saj.
Gjykatësi ka vendosur po ashtu se ndalimi i të krishterëve për të përdorur fjalën “Allah” është “i paligjshëm dhe antikushtetues”, tha avokati i Irelandit, Annou Xavier.
Kushtetuta e Malajzisë garanton lirinë e fesë. Të krishterët në Malajzi thonë se e kanë përdorur fjalën “Allah” për shekuj me radhë.
