Ministria e Arsimit dhe Sportit ka hartuar një projektligj të ri ku shihet se ka disa ndryshime dhe shtesa në lidhje më ndjekjen e ndeshjeve.
Në nenin 3 të këtij projektligji për sportin është bërë një shtesë ku për herë të parë në vendin tonë përfshihet koncepti i “Kartës së Tifozit”.
Kjo kartë duhet të përmbajë disa rregulla në lidhje me anëtarësisë, konsultimin, informimin, përdorimin e stadiumeve dhe tregtimin lidhur me shitjen e biletave.
“VI. PËRMBLEDHJE SHPJEGUESE E PËRMBAJTJES SË PROJEKTLIGJIT
Projektligji “Për disa ndryshime dhe shtesa ne ligjin nr. 79/2017 “Për sportin” përbëhet nga 5nene.
Në këtë projektligj është parashikuar që në nenin 3 të ligjit të sportit të përfshihet
për herë të parë koncepti i “Kartës së Tifozit” e cila është një marrëveshje kontraktuale midis tifozëve dhe organizatës sportive. Në kartën e tifozit do të përcaktohen, të drejtat dhe detyrimet e organizatës sportive ndaj tifozëve të saj, si dhe anasjelltas, sanksionet lidhur me rastet e shkeljes së kësaj marrëveshjeje, si dhe rregulla lidhur mbi mbarëvajtjen e veprimtarisë sportive brenda dhe jashtë vendit.
Karta e tifozit lëshohet nga organizata sportive, pas anëtarësimit të tifozit, sipas llojit të veprimtarisë sportive që kjo organizatë ushtron. Kjo kartë duhet të përmbajë rregulla lidhur me çështjet e anëtarësisë, konsultimin dhe informimin, aksesin dhe përdorimin e stadiumeve, sigurinë dhe mbrojtjen e spektatorit, tregtimin lidhur me shitjen e biletave, aktivitetet e adresuara komunitetit si dhe rregulla të tjera, kundër racizmit, dhunës, ksenofobisë, diskriminimit në futboll.
Projektligji parashikon që rregulli lidhur me procedurën dhe mënyrën për pajisjen me kartën e tifozit të përcaktohen në rregulloren e brendshme të organizatës sportive.”-shkruhet në këtë projektligj./Fjala.al/Katerina Tafa/
