Nga Alfred Lela
Kutitë e zgjedhjeve të 25 prillit prodhuan një mandat të tretë për Ramën, duke siguruar po aq mandate sa në viti 2017. Si e lexoni votën e shqiptarëve?
Ruajtje e status quo-së. Ndërkohe që opozita u rrit, ajo nuk lëvizi nga kuotat e vitit 2013, kur paraardhësi i Bashës, Berisha e kishte lënë pushtetin. Ndërkohë që qeveria u tkurr pak, por jo aq sa për të thënë se kjo tkurrje barazohej me tetë vite qeverisjeje me probleme. Me sa duket në vend të riciklimit të PD, u zgjodh status quo-ja me Ramën.
PD si forca kryesore opozitare ndonëse nuk arriti të merrte pushtetin, pati një rritje të ndjeshme, krahasuar me zgjedhjet e kaluara. Elektorati “shtesë” i saj erdhi nga fryma e krijuar apo mori votat e saj tradicionale të cilat kishin kaluar nga LSI?
Partia Demokratike nuk u rrit në raport me elektoratin dhe me besimin, por në raport me veten. Madje jo me veten e 2013 kur la pushtetin, por me veten e 2017 kur u përpoq për herë të parë ta merrte atë. Me sigurinë e përqindjeve rënëse të njërës dhe rritëse të tjetrës mund të thuhet se PD ka marrë mbrapsht elektoratin e mërguar të LSI para 4 vitesh.
Brenda PD duket se ka zhvillime të reja, ku një pjesë kërkon dorëheqjen e Bashës, ndërsa lobi i Bashës kërkon qëndrimin e tij në krye të PD-së. Çfarë lëvizje shihni? A duhet të jepte dorëheqje Basha?
Basha duhet të japë dorëheqjen, në një kuptim simbolik edhe për të kompensuar dorëheqjen e munguar të zëvendësuar me ngrirje në vitin 2017. Paradoksalisht ka nga ata që i kërkonin dorëheqje në 2017 dhe i kërkojnë të rrijë tani duke zhvlerësuar edhe zhvendosjen në kohë, por edhe një rregull të pashkruar të tranzicionit sipas të cilit lideri i humbur dy herë tërhiqet. Basha është shndërruar në pasiguri për Partinë Demokratike dhe ai nuk garanton më as evoluimin e brendshëm partiak(refuzon të mbajë përgjegjësi) dhe as atë kombëtar, dështon të jetë siguresa e rrëshqitjes së vendit në erdoganizëm.
Menjëherë pas përfundimit të zgjedhjeve, Rama i ka kërkuar Grupit Parlamentar të tij, nisjen e procedurave për shkarkimin e Metës, me motivacionin e shkeljes së Kushtetutës. Shkarkimi i Metës është kapja e çdo pushtetit nga Rama apo një funksionim me përpikmëri i ligjit dhe Kushtetutës?
Venecia e ka kundërshtuar njëherë shkarkimin e tij. Por ka një dritë të re politike që është kursi përplasës me Ambasadën Amerikane, por edhe thirrjet në dukje antikushtetuese për ‘rrëmbimin e armëve’. Pavarësisht këtyre, qeverisë i duhen 2/3 për të votuar shkarkimin e Presidentit. Të cilat nuk i ka.
Faktori ndërkombëtar u shpreh në njohje të rezultatit, ndërsa u bëri thirrje mazhorancës dhe opozitës që të bashkëpunojnë gjerësisht në reformat kryesore. Çfarë parashikoni, Rama do të ndajë pushtet real me Bashën dhe nëse po a bie përfundimisht fryma e opozitarizmit në vend?
Formula e bashkëpunimit është një re e vjetër mbi qiellin politik të Shqipërisë, por pa prodhuar reshje. Rama bën si pa bashkëpunimin apo dhe me të. Mazhorancën e ka të qartë sa kohë nuk ka dosje të manipulimit industrial të zgjedhjeve siç pretendon PD. Në rast të tillë një leshim do të ishin zgjedhjet e parakohshme lokale dhe Presidenca pas një viti.
