Gjatë konferencës për shtyp me Ministrin Gjerman për Evropën, Michael Roth, kryeministri Edi Rama ka komentuar edhe përplasjen me ministrin gjerman të Shëndetësisë, Jens Spahn.
Kreu i qeverisë , teksa kërkoi që turistët gjermanë të vijnë në Shqipëri këtë vetë, tha se vendi ynë është një prej vendeve më të përshtatshme në Evropë për pushime.
“Dua të bëj një falenderim publik për gjithë mbështetjen, në tërësi, që kemi pasur nga Gjermania, nga qeveria dhe të gjithë miqtë. Uroj shumë që në këtë sezon të kemi sa më shumë turistë nga Gjermania. Ndryshe nga çfarë perceptohet nga deklaratat e ministrit të shëndetësisë në Gjermani, Shqipëria është sot vendi më i përshtatshëm në Evropë për pushime dhe meqë ra fjala sot nuk ka më maska në rrugë në Shqipëri.”, tha Rama.
Si nisi përplasja
Pak ditë më parë, Rama u përplas me ministrin gjerman të shëndetësisë, pasi ky i fundit kishte deklaruar se gjysma e infeksioneve nga Covid-19 verën e shkuar në Gjermani kanë ardhur nga vizita familjare të migrantëve në Ballkan.
Në një reagim për gazetën e njohur gjermane, BILD, Rama i është kundërpërgjigjur Spahn, duke e cilësuar deklaratën e tij një skandal.
“Është një skandal që një ministër gjerman denoncon publikisht Ballkanin dhe kështu gjithashtu zhvlerëson njerëzit me një sfond migrimi. Unë nuk do të lejoj që Shqipëria të portretizohet si një zonë rreziku për udhëtimet e pushimeve, pasi nuk ka shifra për ta provuar këtë”, ka deklaruar Rama.
