Okland në Zelandë të Re, është shpallur qyteti më i mirë në botë për të jetuar. Departamenti për hulumtime në gazetën The Economist, ka renditur 140 qytete bazuar në faktorë si: stabiliteti, infrastruktura, edukimi dhe qasja në kujdes shëndetësor.
Mirëpo pandemia e koronavirusit ka dalë të jetë faktor tejet i rëndësishëm në renditjen e këtij viti. Kjo i bie që shtetet evropiane kanë rënë më poshtë në listë, ndërsa ato në Australi, Japoni dhe Zelandë të Re janë ngritur lart.
Këto vende janë përgjigjur shpejt ndaj valëve të pandemisë dhe kanë qenë në gjendje të ulin numrin e rasteve dhe të heqin më shpejt kufizimet në lëvizje.
Okland kryesoi listën e ndjekur nga Osaka në Japoni, Adelaide në Australi, Ëellington në Zelandën e Re dhe kryeqyteti japonez Tokio. Asnjë qytet i Mbretërisë së Bashkuar nuk bëri dhjetëshen e parë.
Ndërkohë, vendet e Bashkimit Evropian, patën një fillim të ngadaltë të shpërndarjes së vaksinave dhe shumë shtete anëtare imponuan bllokime të ashpra të cilat dëmtojnë performancën e tyre në studimin e këtij viti.
Vjena, për shembull, ra nga vendi i parë në 12-të. Kryeqyteti austriak kishte udhëhequr listën për disa vjet, zakonisht i lidhur në krye me Melburnin.
Por Hamburgu në Gjermaninë veriore pati rënien më dramatike – duke rënë 34 vende në të 47-in.
Ky trend u motivua nga një “stres në burimet spitalore” të cilat studimi tha se ishte rritur për shumicën e qyteteve gjermane dhe franceze, duke rezultuar në një “rezultat të përkeqësuar të kujdesit shëndetësor”.
Masat e bllokimit dhe kufizimet në lëvizje gjithashtu ulën jetueshmërinë e përgjithshme, tha studimi.
Damasku mbetet qyteti ku jeta është më e vështirë, kryesisht për shkak të luftës civile të vazhdueshme të Sirisë. Shumë prej qyteteve që renditën dobët janë dëmtuar nga konflikti, i cili ka ushtruar presion në sistemin dhe infrastrukturën e tyre shëndetësore.
Dhjetë qytetet më të jetueshme në 2021
Okland, Zelanda e Re
Osaka, Japoni
Adelaide, Australi
Uellington, Zelanda e Re
Tokio, Japoni
Perth, Australi
Cyrih, Zvicër
Gjenevë, Zvicër
Melburn, Australi
Brisbane, Australi
Dhjetë qytetet më pak të jetueshme në 2021
Damask, Siri
Lagos, Nigeri
Port Moresby, PNG
Daka, Bangladesh
Algjer, Algjeri
Tripoli, Libi
Karaçi, Pakistan
Harare, Zimbabve
Douala, Kamerun
Karakas, Venezuelë./ MCN.Tv
