Forcat RENEA, FNSH dhe policia kanë ndërmarrë një aksion blic pasditen e sotme në zonën e Lungomares në Vlorë.
Nga ky operacion janë shoqëruar disa persona, si dhe është vënë në pranga Edison Begaj, pasi u kap me armë zjarri.
Kujtojmë se disa javë më parë, Begajt iu bë atentat me armë zjarri, nga ku mbeti i plagosur.
Operacioni në Lungomare është zhvilluar për kapjen e personave të shpallur në kërkim dhe armëmbajtje pa leje, por deri tani nuk ka njoftim zyrtar nga policia.
Edison Begaj, një prej personave të arrestuar sot në kuadër të një operacioni të forcave RENEA në Vlorë nuk është një emër i panjohur për policinë. 39-vjeçarit në muajin maj iu bë një atentat me armë zjarri, në prani të fëmijëve të tij të mitur, ku dhe mbeti i plagosur.
Begaj u qëllua në hyrje të banesës së tij, sapo doli nga makina, ndërsa brenda mjetit ndodheshin edhe fëmijët e tij të mitur.
Edison Begaj u qëllua me katër plumba, ndërsa ishte subjekt i OFL, pasi më parë rezulton të jetë dënuar për trafik droge dhe armësh. Në shkurt të 2010 ai është dënuar me 7 vite e 6 muaj burg për drogë. Po ashtu, edhe në vitin 2015 Begaj u kap me 50 kg lëndë narkotike të llojit marijuanë “çokollatë”.
