Kreu i Partisë Demokratike Lulzim Basha ka reaguar lidhur me situatën e rendit në vend pas konfliktit me katër të vrarë që ndodhi gjatë mesnatës në Velipojë. Basha deklaroi se ngjarja vjen si pasojë e modelit që sundon vendin, duke theksuar se “peshku qelbet nga koka!”. “Trushpëlarë, apologjistë me apo pa qira: boll akuzuat njerëzit për të keqen që ka plasur kudo! Është vetëm pasojë e modelit që sundon vendin! Peshku qelbet nga koka!”, shkruan Basha në “Twitter”. Deklarata e kryedemokratit vjen pas asaj të kryeministrit Rama, i cili nga Vlora foli për një ristrukturim në Policinë e Shtetit. Më herët nga Vlora, Rama shmangu komentet për vrasjen e katërfshtë, por theksoi se do lançohet një fazë e re ristrukturimi e Policisë.
Kryemdokrati Basha, në një reagim të mëhershëm tha se shteti është gjunjëzuar para krimit të bërë njësh me pushtetin e korruptuar, ndërsa e konsideroi cinik reagimin e Edi Ramës. Kryedemokrati iu referuar një postimi të kryeministrit në rrjetet sociale, ku Rama shpërndau foto nga bregdeti me mbishkrimin “Mirëmëngjesi nga Velipoja e dashur”, pak orë pas ngjarjes së rëndë. Megjithatë postimi u fshi vetëm pak minuta më vonë nga faqja e kryeministrit në “Facebook”. Në një reagim menjëherë pas ngjarjes së Velipojës, Basha i është referuar statusit të Ramës, ku ky i fundit përshëndeti nga me një foto nga bregdeti i Velipojës. Basha dënon postimin e Ramës, të cilin e quan cinik, teksa shkruan se shteti është gjunjëzuar përpara krimit. Kreu i PD bën përgjegjës për situatën kryeministrin Rama.
“Kur policia reduktohet në vegël të regjimit për të mbrojtur pushtetin dhe lidhjet me krimin, kur përgjigja e vetme sa herë përgjaken qytetet tona është “hëngshin kokat e tyre”, jeta e qytetarëve, fëmijëve dhe familjeve shqiptare është në rrezik. Me postimin cinik si i sotmi pas masakrës së Velipojës, përgjegjësi për këtë situatë nuk e fsheh dot përgjegjësinë e tij, por vetëm rikonfirmon gjunjëzimin e shtetit para krimit të bërë njësh me pushtetin e tij të korruptuar deri ne palcë”, shkruan Basha në “Twitter”.
