Një ngjarje aspak e zakontë ka ndodhur në rrugët e Tepelenës dy ditë më parë. Një 34-vjeçar ka publikuar një video në rrjete sociale teksa bënte “akrobaci” në mes të rrugës.
Ai shfaqet në video duke lëvizur me makinë dhe në një moment del nga dera dhe hipën në pjesën e sipërme të automjetit teksa ajo ishte duke ecur.
Ndërkohë policia njofton se ka arritur të identifikojë dhe të arrestojë të riun për veprime të rrezikshme për sigurinë e jetës në rrugë.
Gjithashtu 34-vjeçari me iniciale A.K. me 60.000 lekë gjobë si dhe iu bllokua mjeti nga policia.
Ngjarja ka ndodhru më 17 korrik rreth orës 13:00 në rrugën e brendshme të fshatit Dragot në Tepelenë.
Njoftimi i plotë i Policisë së Shtetit:
Publikoi video duke kryer veprime të rrezikshme për sigurinë e jetës në rrugë, gjatë drejtimit të mjetit, shoqërohet në Polici, 34-vjeçari nga Tepelena. Ndëshkohet me 60.000 lekë të rinj gjobë dhe me bllokim mjeti.
Shërbimet e Policisë Rrugore, duke marrë shkas nga publikimi i një videoje në rrjetet sociale, ku shfaqej një drejtues automjeti që kryente manovra të rrezikshme në rrugë, kanë identifikuar dhe shoqëruar në ambientet e Policisë, shtetasin A. K., banues në Tepelenë. Ky shtetas, më datë 17.07.2021, rreth orës 13:00, në rrugën e brendshme të fshatit Dragot, Tepelenë, ka kryer manovra të rrezikshme në rrugë duke drejtuar mjetin tip “Volksëagen”.
Për këtë shtetas është vendosur masa administrative 60.000 lekë të rinj, me sanksion plotësues ndalim administrativ i mjetit dhe tërheqje e lejes së qarkullimit për manovra të rrezikshme në rrugë, mosndryshim të pronësisë së mjetit brenda afatit dhe mosshlyerje të masave administrative brenda afatit ligjor.
Policia Rrugore apelon për respektim të rregullave të qarkullimit rrugor, për përgjegjshmëri e përgjegjësi për sigurinë e jetës gjatë drejtimit të automjetit, pasi cilido që do shkelë rregullat e qarkullimit apo do kryejë manovra të rrezikshme në rrugë, që cenojnë rëndë sigurinë rrugore do përballet me Policinë Rrugore, në zbatim të plotë të Kodit Rrugor.
