Ambasadori i Shqipërisë në Kosovë, Qemal Minxhozi, sqaron përse kryeministri Edi Rama nuk takoi gjatë viztës së tij në Prishtinë ditën e hënë presidenten Vjosa Osmani. I ftuar në emisionin “Dekalog” të gazetarit Roland Qafoku në RTSH 24 Minxhozi tha se gjithçka lidhej me faktin se Osmani ka qenë jashtë Kosovës dhe ka mbërritur në Prishtinë ditën e dielë dhe për këtë arsye nuk ka qenë e përfshirë në axhëndën e takimeve. Më 17 dhjetor të vitit të kaluar gjatë vizitës së presidentes Vjosa Osmani në Tiranë kryeministri Edi Rama nuk ishte present në seancën parlamentare gjatë kohës kur ajo mbajti fjalimin përshëndetës duke sjellë shumë debate. Por rasti në fjalë nuk lidhet me mosmarrëveshjet mes Ramës dhe Osmanit. Më poshtë përgjigjet e ambasadorit Minxhoi lidhur me takimin e munguar të Ramës me presidenten e Kosovës Vjosa Osmani.
Zoti ambasador, a ka patur kërkesë nga kryeministri Edi Rama për takim me presidenten Osmani?
Problemi është se kryeministri i Shqipërisë dhe Kosovës janë dakorduar për programin e vizitave që ditën e dielë. Ka qenë një program shumë i ngjeshur. Për të hequr çdo aludim që mund të ngrihet për këtë çështje unë po them që nga ora 08.20 kur delegacioni i Shqipërisë ka mbërritur në aeroportin “Adem Jashari” dhe deri në orën 17.00 kur ka qenë kulmi i vizitës janë realizuar 10 takime dhe vizita të ndërsjellta.
A është çështje kohe kur takohet kryetari i një partie që përfaqëson 7 për qind të popullsisë dhe të mos takosh presidenten?
Të jeni të sigurtë që nëse zonja Osmani do ishte në Kosovë kryeministri Rama do ta takonte atë patjetër. Ashtu si edhe kryetarin e Kuvendit i cili erdhi në limitet e fundit të kohës.
Takimet përgatiten me ftesë, nuk përgatiten në çast.
Po pikërisht me ftesë. Nuk ka patur kërkësë nga kryeministri sepse ka qenë një vizitë shumë e shpejtë. Shumë intesive dhe një kohë limit në maksimum. Nuk ka qenë një vizitë e planifikuar javë më parë ku do shikohej ku është njëri dhe ku është tjetri. Dhe shpesh herë ndodh që edhe gjatë vizitave në Shqipëri, jo të gjithë udhëheqësit ndodhen aty.
