Albin Kurti do të zhvillojë nesër në Tiranë vizitën e parë zyrtare si kryeministër i Kosovës. Axhenda zyrtare nuk është zbardhur ende, por në bazë të një deklarate që Kurti ka dhënë një javë më parë për Zërin e Amerikës, ai paralajmëroi se do të takohet me homologun Edi Rama dhe zyrtarët e tjerë, përfshirë kryeopozitarin Lulzim Basha.
Kërkesa e Kurtit për Ramën do të jetë e qartë në raport me marrëdhëniet e shqiptarëve me fqinjët. Sipas kryeministrit të Kosovës, Tirana duhet të fokusohet te fqinjët jugor dhe perëndimor, Greqi dhe Itali, ndërsa duhet të jetë Prishtina që do orientojë dhe vendosë për marrëdhëniet me fqinjët veriorë të shqiptarëve, kryesisht Serbinë.
“Unë synoj që javën e ardhshme të vizitoj Tiranën dhe të zhvilloj takime me liderët institucional atje, me kryeministrin Rama, me presidentin Meta, me kryeparlamentarin Ruçi, me kryetarin e opozitës Basha dhe në këtë mënyrë t’i diskutojmë së bashku këto çështje. Unë nuk jam kundër iniciativave për bashkëpunim rajonal, mirëpo aty duhet të jetë parimi i reciprocitetit dhe përderisa Republika e Shqipërisë i njeh më mirë fqinjët tanë jugor dhe perëndimor, është Republika e Kosovës ajo që i njeh më mirë fqinjët tanë lindor dhe veriorë dhe në këtë aspekt ne mund të jemi komplementar”, është shprehur më herët Kurti.
