Komedia “Kopshti me Dallëndyshe” rikthehet për të dytën herë fiks pas 21 vitesh. Vepra do të vendoset premierë në teatrin Kombëtar Eksperimental, tek Art Turbina, më 23 dhjetor. Shkruar nga Babis Cikliropulos, regji të Kico Londo dhe një kast brilant aktorësh: Ermira Hysaj, Erand Sojli, Arjola Demiri, Suela Bako, Mehdi Malkaj, Naun Shundi.
Në emsionin “Ditë e Re” ku ishte i ftuar Mehdi Malkaj foli rreth kësaj komedie. Pyetur për rolin e tij ideal Malkaj shprehet se ka dashur gjithë jetës të bëjë personazhin e Apollonit te vepra “ Hamleti ” e William Shakespeare.
“Rol ideal është fjalë e madhe por unë kam vetëm një ëndërr të bëj Apollonin tek Hamleti. E dua. Nëse do vihet ai le të ketë audicione sa të dojë unë do të bëhem copash që ta marr. Më pëlqen sepse është personazh tragjikomik. Unë i dashuroj janë lëngu i jetës këta personazhe”
Rreth shfaqjes ai nënvizoi se është nga ato veprat e rralla me të cilat qesh dhe qan njëkohësisht.
“Është një vepër që edhe mund të qeshësh brenda po kur të dalësh jashtë duhet të marrësh ndonjë gur t’i biesh kokës. Realisht të çmendurit janë jashtë thotë personazhi kryesor Hari ta dija kështu do të rrija jashtë”.
Mehdi Malkaj është është një nga aktorët e njohur të skenës dhe kinemasë shqiptare. U diplomua në Institutin e Lartë të Arteve në vitin 1983. Fillon punë në Estradën e Ushtarit dhe më pas në Teatrin e Varietesë së Tiranës. Në teatër do ta gjejmë në disa role si p.sh në rolin e Babait në dramën “Babai” e Ruzhdi Pulahës, në rolin e Shëvalit në komedinë e “Darka e të marrëve” e Veberit, në rolin e Shmalcit në dramën “Franku i V-të” e Fridrih Dyrrenmatit etj..
Në kinematografi ka interpretuar në shumë role. Roli i tij i parë do të jetë ai i Milo budallait në filmin “Përrallë nga e kaluara” në vitin 1987. Më tej do të vazhdonin edhe role të tjera në shumë filma si roli i pijanecit në filmin “Jeta në duart e tjetrit” në vitin 1990, roli i babait të Lolos në filmin “Shpella e piratëve në vitin 1991.
Por roli që do ta bëjë të njohur për publikun do të jetë roli i xha Brahos në komedinë televizive “Gjuetia e fundit” në vitin 1992. Roli i tij më i fundit është roli i Emil Bregut në filmin “Ne dhe Lenini” në vitin 2009.
