Enkelejda Hoxha, ish-gjyqtarja e Krujës e akuzuar për korrupsion do të përfitojë gjykim të shkurtuar. Duke qenë se ajo kishte depozituar në Gjykatën e Posaçme kërkesë për gjykim të shkurtuar, rrjedhimisht ajo ka pranuar dhe akuzën e ngritur për “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, kryer në bashkëpunim.
Edhe të akuzuarit e tjerë kanë kërkuar gjykim të shkurtuar duke pranuar akzuat, por duket se GJKKO ka pranuar vetëm kërkesën e Enkelejda Hoxhës. Seanca e radhës për ish-gjyqtaren e Krujës, e cila liroi nga burgu disa kriminelë të dënuar përjetë, do të mbahet me 17 nëntor ora 10.00.
Në seancën paraprake gjykim të shkurtuar kanë kërkuar Aldo Tabaku, Manuela Mallkuçin, Bledar Petani, Sajmir Petani, Altin Skëndaj, Gazmir Nezaj dhe Gentjan Nezaj. Mësohet se i vetmi që nuk kërkoi gjykim të shkurtuar është Isuf Tanuzi.
Kujtojmë që gjyqtarja Enkelejda Hoxha së bashku me 8 të tjerë janë arrestuar me urdhër të SPAK teksa ishin në seancën gjyqësore dhe bëheshin gati t’i jepnin lirinë Sajmir Petanit, i dënuar për vrasje.
Enkelejda Hoxha ka firmosur lirimin nga burgu të anëtarit të bandës së Durrësit Endrit Dokle, i cili ishte dënuar me burgim të përjetshëm. Po ashtu Hoxha ka liruar nga burgu Genc Tafilin, i dënuar për vrasjen e komisarit të Policisë Arben Zylyftari si dhe Ilir Pajës, të cilit i kishte mbetur mbi një vit dënim.
