Presidenti i Serbisë, Aleksandër Vuçiç i ka cilësuar politikanët e Kosovës krejt pa vizion për të ardhmen e tyre dhe të Ballkanit.
Ai komentoi për herë të parë refuzimin e ftesës së Kosovës për të marrë pjesë në mini-shengenit ballkanik.
Vuçiç tha se politikanët në Kosovë nuk e kuptojnë realitetin ku jetojnë.
Ai shtoi se ata nuk duan të jetojnë në të tashmen dhe nuk kanë vizion për të ardhmen.
Vuçiç dhe Zaev u pritën nga kryeministri i Shqipërisë, Edi Rama dhe takimi ishte informal.
Ndërsa Kosova refuzoi ftesën e Ramës për të marrë pjesë në takim. Presidenti Hashim Thaçi tha se kjo nismë është e pakuptimtë, në një kohë kur sipas tij, Serbia ka bërë gjenocid ndaj kosovarëve dhe ende vazhdon të mos e njohë pavarësinë.
Thaçi tha se për sa kohë nuk do të ketë njohje reciproke me këto shtete, nuk mund të këtë përparim në aspektin e bashkëpunimit rajonal.
Takimi i sotëm u prit me protesta nga Lëvizja Vetëvendosje. Ajo kërkoi që Vuçiç të shpallej non-grata.
