Dy ditë më parë në Tiranë u përhap një informacion se një sëmundje e rëndë bagëtish ishte [përhapur në zonë e Bërzhitës. Madje u shkua deri atje sa pati aludime në lidhje me ndonjë sëmundje që mund të kërcënojë edhe jetën e njerëzve por ka qenë i menjëhershëm reagimi i Ministrisë së Bujqësisë që ka dhënë informacion konkret për këtë fakt. Zyrtarisht u bë me dije se 51 kokë dhi kanë ngordhur në një fermë në fshatin Dobresh në njësinë Administrative Bërzhitë në pronësi të Faik Nelkut.
Ministria e Bujqësisë thekson se dhitë janë prekur nga sëmundja e eneterotoksemisë, që ka filluar më datën 31.01.2020. Sipas njoftimit të ministrisë, pas njoftimit nga ana e fermerit për rastet e ngordhura të dhive në fermë ka shkuar një grup i kryesuar nga përgjegjësi i Shërbimit Veterinar në ARSHVMB Tiranë, Gëzim Shehu, veterineri Fiqiri Gabi dhe Besmir Binaj për kryerjen e hetimit të rastit. Po sipas ministrisë, fermeri ka vaksinuar privatisht kafshët për sëmundjen e eneterotoksemisë, më datën 31.01.2020, por nuk ka bërë efekt.
Shërbimi veterinar ka marrë kampione nga kafshët e ngordhura, të cilat janë dërguar në laboratorin e shëndetit të kafshëve në Institutin e Sigurisë Ushqimore dhe veterinarisë Tiranë. Gjithashtu janë marrë masa për groposjen e kafshëve, ndërsa ferma u vendos në karantinë. Ministria e Bujqësisë njofton se pas analizimit në laborator rezultoi se shkaku i ngordhjes së kafshëve është sëmundja e Enterotoxemisë. “Sëmundja e enterotoksemise nuk është sëmundje zoonotike që nuk e prek njeriun! Sëmundja e enetrotoksemise shkaktohet nga klostridium perfigens të llojeve te ndryshme.
Klostridiumet të pranishëm në mikroflorën e aparatit tretës prodhojnë toksina shkaktare të ngordhjes së kafshëve. Për vaksinimin e kafshëve kundër sëmundjes së enterotoksemise është detyrë e vete fermerit. Sëmundja e enetrotoksemisë nuk është në listën e sëmundjeve të cilat mbështeten nga buxheti i shtetit, bazuar në Vkm. Nr. 408.13.05.2013 “Për dëmshpërblimin e kafshëve të eliminuara” e ndryshuar. Ferma është mbajtur në mbikëqyrje të vazhdueshme nga ana e Shërbimit Veterinar Rajonal, Tiranë” përfundon njoftimin ministria. Sipas veterinerëve kjo sëmundje prek vetëm delet dhe dhitë dhe është e detyrueshme që dy herë ne vit të vaksinohen. Vaksina duhet bërë 40 ditë para se të lindin në mënyrë që keci apo qengji të mos rezultojë i sëmurë. Kur sëmundje, po sipas veterinerëve agravon dhe bëhet e vështirë parandalimi nëse nuk janë vaksinuar. Vaksinat që vijnë në vend kryesisht janë çeke, spanjolle dhe italiane. n.k/Fjala.al/
