Gjykata e Tiranës ka lënë në burg 39 vjeçarin Ajas Sulejmani, shoferin që lëvizte me “Mercedes G Class” në Tiranë dhe përplasi një çift e fëmijën e tyre tre muajsh. Arjan dhe Vilma Konomi ishin duke kaluar me foshnjën në vijat e bardha, kur u përplasën nga Sulejmani.
39 vjeçari ka dalë sot para togave të zeza, të cilat kanë pranuar kërkesën e Prokurorisë së Tiranës për mbajtjen e tij në masën e sigurisë “Arrest në burg”. Ngjarja e rëndë ndodhi ditën e diel në “Rrugën e Kavajës”, në kryeqytet, në vendin e quajtur Pallatet e Delijorgjit.
Në dëshminë e tij Ajas Sulejmani ka pretenduar se nuk i kishin punuar frenat mesditën e 8 majit, ndaj dhe ishte futur në semafor me të kuqe. Ai gjithashtu ka thënë se ka qenë duke lëvizur me një shpejtësi 40 km/orë, jo më shumë.
