“Ku janë fëmijët e mi? Si janë”? Këto janë fjalët e para të 26-vjeçares shqiptare, e cila u plagos me thikë nga ish-partneri në La Spezia të Italisë.
E reja, identiteti i të cilës nuk është bërë i ditur, ndodhet në spital. Ajo është ende në gjendje të rëndë, por jashtë rrezikut për jetën. Gjëja e parë që u interesua kur u bë e vetëdijshme në spital ishin fëmijët. Siç shkruajnë mediat, ka qenë avokati që e ka njoftuar që ata janë mirë, por e reja shqiptare ka vazhduar të qajë për disa minuta.
Ndërkohë, autoritetet arrestuan ish-burrin e saj, Sokol Begaj, 37 vjeç. Javën e kaluar ai mori një thikë dhe e goditi ish-partneren në një autobus, mes personave të tjerë, duke i terrorizuar të gjithë ata. Avokati i shqiptarit ka thënë për mediat se Begaj është në gjendje të vështirë psikologjike dhe nuk kupton se çfarë ka ndodhur. Sipas hetimeve, vetëm një ditë para ngjarjes, Begaj dhe 26-vjeçarja kishin arritur një marrëveshje për kujdestarinë e fëmijëve.
Mësohet se shqiptari e goditi të paktën 7 herë me thikë ish-gruan. Por çfarë ndodhi që situata shkoi deri në këtë pikë?
Sipas mediave italiane, harmonia në çift kishte marrë fund prej disa kohësh. Ish-gruaja denoncoi Begajn për dhunë në familje. Kjo bëri që të ndërhynin punonjësit socialë të cilët i besuan fëmijët të ëmës. Muajt e fundit, Begaj ishte përpjekur që të gjente një kompromis me ish-gruan. E enjtja ishte dita e madhe! Ata u paraqitën në një studio ligjore dhe ranë dakord për gjithçka. Fundjava alternative dhe vizita gjithnjë e më të shpeshta nga babai për fëmijët.
Sipas avokatëve gjithçka ishte gati për ta çuar marrëveshjen në gjykatë. Por këtu mësohet se Sokol Begaj është shtruar në spital mbrëmjen e së enjtes. Bëhet fjalë për probleme psikologjike, por kjo nuk konfirmohet zyrtarisht. Pas daljes nga spitali, Begaj ka shkuar të vizitojë prindërit që i ndodhen në të njëjtën zonë ku ndodhi plagosja. Në apartament me gjyshërit ishte edhe djali i vogël, ndërsa i madhi ishte në një kamp veror. Mësohet se ish-gruaja është informuar dhe ka shkuar pranë shtëpisë së ish-vjehrrëve. Por ajo nuk është ngjitur në banesë, pasi ka pasur një përplasje të ashpër verbale me Begajn.
Pjesa tjetër është ajo që raportuan mediat dhe që për pak nuk u kthye në tragjedi. Sokoli zbriti shkallët me shapka dhe pa këmishë. Në dorë kishte një thikë kuzhine. Gruaja u përpoq të largohet dhe mes britmave kërkonte ndihmë. Por askush nuk e dëgjoi. Ajo tentoi të ngjitej në një autobus, por burri e kapi dhe e plagosi disa herë. Njerëzit brenda në mjet u tmerruan nga pamjet. Ajo u shpëtua nga disa persona të cilët i gjetën disa peshqirë dhe i shtypën plagët për të shmangur gjakderdhjen.
Ndërkohë Sokoli u kthye në shtëpinë e prindërve sikur të mos kishte ndodhur asgjë. Disa minuta më vonë do të arrestohej nga policia. Pritet që ditën e sotme të mësojë masën e arrestit me burg. Ndërkohë gjykata deri më tani ua ka besuar kujdestarinë e fëmijëve përkohësisht gjyshërve nga babai. Ndërkohë e ëma është shprehur mes lotësh nga spitali se kur të bëhet më mirë nuk do t’i lërë më kurrë.
