Brenda pak ditësh, vendi ynë u trondit nga dy ngjarje të rënda kriminale, që u morën jetën 4 të rinjve.
Më 17 maj, u vranë me breshëri plumbash Brilant Martinaj dhe dy shokët e tij, Diklen Vata dhe Besmir Hoxha. Mbrëmjen e djeshme, pas rreth 100 plumbash të derdhur mbi ta, u vra Klisman Preçi dhe mbeti i plagosur Ylli Ibrahimi.
Por duket se këto ngjarje të rënda kanë një lidhje me njëra-tjetrën. 46-vjeçari Ylli Ibrahimi, dyshohet se ka lidhje me Ervis Martinaj, një emër shumë i njohur për policinë, i dënuar me 1 vit e 4 muaj burg si i përfshirë në vrasjen e Enton Nikës dhe plagosjen e Ismet Gaxherrit në vitin 2015 në zonën e Linzës. Por, po ashtu Martinaj ka miqësi edhe me 3 viktimat e Fushë-Krujës.
Duket se kundërshtarët po vrasin një nga një bandën e Martinajt, teksa, në gusht të vitit 2019 është tentuar të vritet dhe vetë ai. Kur në Tiranë u ekzekutua ish-polici Santiago Malko, në hetimet e SPAK nënvizohet se plani ishte edhe vrasja e Ervis Martinaj. Për këtë vrasje, u dënua vetëm Bledi Teta me 25 burg. Në kërkim janë Leonard dhe Erlis Duka dhe disa persona te tjerë të cilët kishin rol në këtë organizim dhe ekzekutimin e Malkos.
Ndërsa në 13 nëntor te vitit të kaluar po në Tiranë do ekzekutohet Erigers Mihasi, i cili njihej si shok i ngushtë i Ervis Martinajt, ndërsa viktima tjetër Armando Dumani pasagjeri që ndodhej me të në Audin e bardhë, rezulton se është fqinj i tij në Yrshek.
