Bajram Begaj, kreu i ri i shtetit që mori detyrën ditën e djeshme është aktivizuar në rrjete sociale dhe sot i ka drejtuar një pyetje qytetarëve për të bërë krahasimin mes të rinjve në vendin tonë me ata jashtë.
Në një postim në Instagram, Begaj shkruan: “Çfarë u mungon të rinjve në Shqipëri në krahasim me ata jashtë?” Këtë pyetje e ka shoqëruar me një fotografi nga Kuvendi ku u miratua me 78 vota pro si Presidenti i 8-të i Shqipërisë.
Bajram Begaj bëhet presidenti i 8-të i vendit të Shqipërisë post komuniste dhe i 3-ti që vjen nga radhët e ushtrisë, pas Alfred Moisiut dhe të ndjerit Bujar Nishani. Sapo mori detyrën, Begaj tha se prioritetet e tij në mandatin 5-vjecar si kreu i ri i shtetit janë uniteti politik dhe njerëzor, siguria kombëtare, rrugëtimi drejt BE dhe roli i Shqipërisë në arenën ndërkombëtare. Begaj shtoi se po e merr këtë përgjegjësi në një moment historik dhe misionin e ri që i është besuar do ta kryejë mbi palët e nuk do të qëndrojë neutral ndaj asnjërit që vendos interesat politike përpara interesit të Kombit.
Kur u betua në Kuvend me dorën mbi Kushtetutë, Begaj mbajti fjalimin që ia kushtoi luftës në Ukrainë, e më pas rrugës së pakthyeshme drejt integrimit. Një mesazh e pati edhe për qeverinë dhe opozitën, ndërsa paralajmëroi 0 tolerancë ndaj kujtdo që vë interesat e tij para atyre të kombit.
